Minister Dowers a lansa Taxi.aw:
ORANJESTAD (AAN): Riba Dialuna Minister di Husticia, Integracion, Transporte Publico y Energia mr. drs. Arthur Dowers a lansa oficialmente e website www.taxi.aw, pa tarifanan di taxi na Aruba. E tarifanan actualisa ta drenta awe na vigor, esta Diaranson dia 20 di mei 2026.
Cu e plataforma digital nobo aki, pasaheronan lo por calcula tarifanan di taxi di antemano den un forma facil, cla y accesibel. E “Taxi Fare Calculator” ta tene cuenta cu diferente componente cu tin influencia riba e tarifa final, manera cantidad di pasahero, maleta, uzo di bahul, dianan di fiesta y tambe gasto adicional pa orarionan laat entre 11:00 p.m. y 7:00 a.m. Adicionalmente, usuarionan por mira tur e componentenan cu hunto ta forma e prijs final.
Taxi.aw ta ofrece mas flexibilidad pa futuro, permitiendo autoridad pa adapta e tarifanan y haci coreccion ora ta necesario. Den e siguiente fasenan di desaroyo, lo sigui añadi mas sitio como punto di salida y destinacion den e calculator. Por ehempel, na luga di solamente uza descripcionnan general manera Low-Rise, Eagle Beach, High-Rise South of High-Rise North, usuarionan lo por busca directamente riba nomber di e destinacion.
Ademas riba e website, usuarionan por haya informacion importante tocante condicionnan y reglanan pa servicio di taxi. Bao di e seccion “Downloads”, tin diferente documento oficial disponibel pa download. Tambe tin posters, flyers y QR codes cu por imprimi pa coloca den taxi, aeropuerto, hotel lobbies, restaurant lobbies y otro sitionan turistico. Pronto lo upload mas documento oficial.
Un otro componente importante di Taxi.aw ta cu pasaheronan awo por entrega reclamo directamente a traves di e website, den caso di overcharging of otro violacion relaciona cu servicio di taxi.
Minister Dowers a indica cu e meta principal di Taxi.aw ta pa haci tarifanan y reglanan di servicio di taxi mas cla, moderno y accesibel pa taxistanan, pasaheronan y henter sector turistico.
Gobierno kier un sistema mas transparente y facil pa tur hende. Taxi.aw ta un paso importante den modernisacion di nos servicio di transporte y den fortalece confianza entre dunado di servicio y usuario.
