Parlamentario Ricky Hoek riba Dia Mundial di Trabao Social 2022
ORANJESTAD (AAN): Diamars dia 15 di maart 2022 tabata Dia Mundial di Trabao Social. E tema cu ta ser presenta e aña aki pa e Federacion Internacional di Trabao Social ta: ‘Construi hunto un mundo eco-social nobo; lagando niun hende atras’. E tema ta presenta un vision y plan di accion pa crea balornan, maneho y practicanan global nobo cu lo desaroya confianza, seguridad y confianza pa tur persona y e sostenibilidad di nos planeta.
Loke e tema aki kier splica: Den e profesion di Trabao Social tin diferente teoria y un di e teorianan intergral cu ta relata na e topico di aña aki ta e teoria di “The Person-in-environment perspective”. Na papiamento esey kiermen: ‘E perspectiva di e persona-den-su-ambiente’.
E teoria aki ta mustra e importancia di compronde un persona y su comportacion den relacion cu e contexto ambiental den cua e persona ta bida y actua/funciona.
Dia Mundial di Trabao Social 2022, lo ta un oportunidad pa e profesion di trabao social pa compromete tur red/netwerk di trabao social y e comunidadnan cu nan ta traha aden, pa haci contribucionnan na e balor y principionan cu ta yuda respeta dignidad di tur hende.
Dia Mundial di Trabao Social ta worde celebra rond di mundo. E tema di 2022 ta worde promovi door di trahadonan social rond di mundo y actualmente ta envolvi un colaboracion global entre miyones di persona. Trabao social ta e profesion cu ta uni diferente sector cu otro y ta brinda cada ciudadano e oportunidad pa desaroya su mes den un miho persona cu un futuro sostenibel.
“Mi ta manda un palabra di felicitacion na tur Trahado Social riba nan dia y desea nan forsa, curashi y pasenshi pa continua cu e trabao bunita y valioso aki. Nos comunidad ta florece a base di boso pasion y empatia pa sirbi comunidad,” Hoek a finaliza bisando.
