Martij Balkestein, Director di Camara di Comercio
ORANJESTAD (AAN): Director di Camara di Comercio (KvK), Martijn Belkestein a indica cu nan a cuminsa cu un encuesta relaciona cu escases di empleadonan, y lamentabelmente no tabatin ningun instancia cu por a indica e cantidad di empleado necesario. El a indica cu nan a acerca diferente Minister y organisacionnan cu por a duna un mihor bista riba e situacion, pero no tabatin informacionnan concreto, pa e motibo aki, KvK a dicidi di cuminsa un estudio.
Por lo menos 400 compania a participa den e survey di KvK y e resultado ta un poco alarmante, segun Balkestein, pasobra 76% di comerciante a indica cu nan ta confronta problema serio pa haya hendenan cualifica pa yena nan vacatura.
Comerciantenan tambe a indica cu nan ta mira cu e situacion no ta bay mehora na corto plazo y sigur no ta bay wordo soluciona e aña aki. Balkestein a bisa cu e tambe tin e mesun opinion aki y cu e situacion por bira mas intenso den futuro.
El a agrega cu otro punto remarcabel ta cu e escases di trahador ta afectando tur sector, no solamente hotelnan of restaurantnan, pero tambe sectornan manera construccion y benta. E problema a cuminsa den sector di hotelero, pero nan si tin e poder di ofrece salarionan competitivo, pero esaki ta causa un efecto 'domino' cu ta afecta e otro sectornan.
Balkestein a indica cu nan lo publica un informe pa asina tur comercio por haya un bista mas amplio, como tambe intercambia e feedback di otro comerciantenan relaciona cu e situacion. Nan tambe lo presenta e datonan na Gobierno pa asina yega na un solucion.
