ORANJESTAD (AAN): Vakantie grandi poco poco ta yegando su final. Den tres siman mayoria mucha na Aruba ta bayendo bek scol.
Aunke tur mucha kier disfruta di nan delaster dianan di vakantie, ta sumamente importante pa nos cuminsa prepara pa bay bek scol.
Esaki ta encera e organisacion pa asina tur cos ta cla pa bo yiu(nan) bay scol, alabes preparacion na cas pa asina bo yiu(nan) por beneficia mas tanto posibel di nan educacion.
Organisacion pa scol: Traha un budget y traha un lista di tur loke bo yiu(nan) falta ainda pa bay bek scol. Esaki ta haci'e mas facil pa'bo como mayor ora mester bay cumpra acticulo di scol. Envolve bo yiu(nan) den e preparacion y haci esaki
algo placentero.
Preparacion na cas: Evita warda te cu e anochi prome cu scol habri pa bo yiu(nan) drumi trempan. Laga bo yiu(nan) custuma di drumi trempan un pa dos siman prome cu nan prome dia di scol. Segun American Academy of Pediatrics, muchanan bou di 6 aña mester drumi 11 ora tur anochi y muchanan di scol basico mester drumi 9.5 pa 10.5 ora.
Alabes, percura pa prepara un lugar trankilo na unda bo yiu(nan) por concentra y traha nan huiswerk.
Importancia di un rutina: Crea un rutina di mainta y purba mantene esaki diariamente. Siña bo yiu(nan) pa ta independiente. Esakinan lo beneficia boso como famia a lo largo. Un bon rutina di mainta ta cumisa for di e anochi prome cu
un bon sosiego. Purba custuma bo yiu(nan) pa drumi y lanta rond di e mesun
orario tur dia. Laga bo yiu(nan) desayuna bon tur mainta prome cu nan bay scol. Tene bon na cuenta cu e trafico parti mainta pa asina evita stress.
Corda envolve bo mes como mayor den e educacion di bo yiu(nan). Yuda nan cu nan tareanan di scol y papia cu nan tocante e importancia di un educacion.
Cada mucha ta diferente, pues no compara ningun mucha nan desaroyo cu esun
di un otro. A contrario, demostra nan cuanto bo stima nan y con orguyoso bo
ta di nan desaroyo y nan logro.
E prome dia di les pa Aña Escolar Nobo pa 2024-2025 na Aruba ta Dialuna 19 di Augustus 2024.
