Ni CPR no a yuda mas
ORANJESTAD (AAN): Un situacion fastioso a presenta su mes Diahuebs mainta pa un caso cu ta pasando den lama.
Tabata exactamente 10:32 am, cu e prome yamada a drenta na Central di Polis. E mensahe a yega for di Centro di Alarma 911, indicando cu na Mangel Halto un turista masculino a haya problema den lama y no ta reaccionando. Ya caba Centro di Alarma a sali rumbo pa Mangel Halto.
Central di Polis na su turno a manda patruya di San Nicolas, cu a mobiliza y a presenta cu maximo urgencia na e lugar di sucedido.
Ora cu Ambulance y Polis a yega, nan a bin haya dos boluntario ta practicando CPR riba e victima banda di lama. Paramediconan mesora a tuma over, y a sigui cu e reanimacion y a pone aparato na e curpa pa detecta batimento di curazon.
Sinembargo lamemtablemente no por a haci nada mas pa e persona. Dado momento no por a sigui cu CPR, y a stop cu tur cos. A pidi pa Polis manda un Docter pa eynan.
Vocero Liliana Rasmijn di Cuerpo Policial a splica cu ta trata di un turista masculino di nacionalidad Mericano di 72 aña di edad.
Docter di team Forensico di Polis a yega, como tambe team forensic di BFTO. Docter a constata morto di e turista.
Bureau Slachtofferhulp a presenta na e lugar pa brinda e famia e sosten den e momentonan aki. DIARIO y Cuerpo Policial ta manda palabra di condolencia na famia di e fayecido.
