Pronto lo tin accion
ORANJESTAD (AAN): Pa awor ya tur hende mester por sa di ley cu ta regarda areanan publico.
Hecho ta cu bo mag di para of core cu auto riba caminda publico solamente si e tin plachi di number, pues e nummerplaat belasting tin di ta paga. Tambe e auto mester tin tur su wielnan cu cual e ta para riba caminda. Pero asina cu e ta mal staciona, para riba acera, y para incorectamente, e ta un asunto cu ta regarda Cuerpo Policial.
Sinembargo si acaso ta trata di skelet di auto, autonan bieu, etc., esey ta cay bao di Bureau City Inspector pa atende. Relaciona cu e cantidad di Garashi ilegal cu tin aworaki den pueblo, nan ta preparando un plan pa bay cu un ‘team completo’ pa controla tur esaki.
Robby Rosel kende ta vocero di City Inspector, a splica cu Inspectornan di Bureau City Inspector, hunto cu Departamento di DNM, y tambe Cuerpo Policial tin preparacion andando pa hunto subi caya y controla tur esakinan. Falta djis algun detaye ainda pa e accionnan aki cuminsa.
Nan lo ta den e accion aki riba Garashi y si acaso abo tin un garashi pero sin ningun clase di vergunning of papel di Camara di Comercio, automaticamente bo ta den problema grandi. No djis pa esey so, sino si bo tin cantidad di auto bieu benta rond di e Garashi.
Tin di corda cu no ta djis Polis por duna boet, sino cu Bureau City Inspector tambe tin capacidad pa duna boet, y Departamento di DNM (Natuur en Milieu) tambe por duna boet.
Ainda falta par di aspecto pa keda cla, pa asina e accion masal contra esnan cu tin auto bieu poni riba caminda publico por wordo kita legalmente, y tur e instancianan lo ta trahando hunto. Si nan haya autonan bieu y sin number para riba acera of caminda dilanti bo Garashi, lo bo haya tempo di 5 dia pa abo mes kita nan di eynan, sino despues e team mes lo regresa cu Takelwagen of Dumptruck y bay cu nan di eynan, fuera dunabo boet.
