Milo Croes, presidente di FCCP hopi contento y gradici:
ORANJESTAD (AAN) – Juffrouw Juliette, docente y Manager di Unidad di Economia di Colegio Educacion Profesional Intermedio (EPI), a duna informacion, brevemente, tocante e lanzamento di un proyecto cu su grupo di studiantenan a ehecuta pa yuda e Fundacion di Cancer di Prostaat, actualiza nan website.
Pa elabora mas den detaye di e proyecto aki Milo Croes, Presidente actual di e fundacion, ken a wordo invita pa participa den e proyecto di tres studiante di Colegio EPI. El a bisa cu e studiantenan a haci un trabao grandi pasobra e website di e fundacion tabata fuera di actualidad.
El a wordo introduci entre 2011-2012, e tabata bon y mesun informacion practicamente nan a pas’e over, y e studiantenan a traha un website basta moderno cual ta yuda den e pensamento di hende homber. Nan a cambia e concepto y a hinca cosnan nobo. E website ta prostaataruba.org. Eyriba tin tur informacion incluso pa haci donacion.
Un di e studiantenan cu a traha den e proyecto a expresa cu e dia aki tabata hopi grandi pa nan, pasobra como proyecto final, como studiantenan di 4de Klas, a scoge un fundacion cu no ta hopi conoci na Aruba, cual ta Fundacion contra cancer di prostaat (FCCP), y como grupo nan a scoge esaki pa pasobra pa nan e fundacion ta algo nobo. El a conta cu nan a acerca e fundacion y a puntra nan kico nan ta desea. E fundacion a bisa nan cu nan mester di un website unda por informa e comunidad di Aruba.
Di parti di e studiantenan nan mester a busca sponsors y nan ta hopi agradecido cu nan a haya varios patrocinador cu a colabora pa nan por a haci e proyecto aki posible. Tambe nan ta gradici señor Michael di e studio cu a yuda nan traha e diseño.
Tres studiante a participa den e proyecto aki. E proyecto aki ta un regalo pa Fundacion contra cancer di Prostaat, pasobra nan ta kere cu henter comunidad mester ser conoci cu ne, y e ta pa hende homber.
E fundacion ta concientiza e cabayeronan pa nan check nan peso alomenos un bez pa aña, pasobra esaki ta hopi importante. Y pa papia di salud pasobra pa hende homber esaki ta un tabu. Y e meta di e fundacion ta pa concientiza hende homber pa, por fabor, tin consideracion cu nan mes, controla nan salud y asina por traha hunto pa combati cancer di prostaat.
{gallery}Tres studiante di Colegio EPI, Unit Economia, a traha un website moderno pa Fundacion contra cancer di prostaat{/gallery}
