Dr. Rodriguez: Risico di infeccion ta minimal y no mester crea panico
*Tur caso a wordo diagnostica, isola y trata
*Tin 8 caso mas pero no ta di tuberculosis activo
ORANJESTAD (AAN): Diaranson mainta un conferencia di prensa a wordo convoca pa Departamento di Salud caminda e topico principal tabata e situacion di e casonan di Tuberculosis cu a wordo constata na Instituto Corecional Aruba (KIA).
Dr. Ernesto Rodriguez, Hefe di Departamento Medico di KIA a cuminsa dunando un panorama pa loke ta salud den e institucion y el a indica cu desde december a detecta un pashent cu tabatin sintomanan. A test e pashent y el a sali positivo pa tuberculosis.
El a enfatisa cu no ta e prome pashent cu KIA tin cu tuberculosis, diagnostica y trata na KIA. Den añanan anterior tambe tabatin casonan diagnostica y trata.
Dr. Rodriguez a indica cu e caso aki particularmente ta e caso di e aña aki cu a wordo diagnostica y trata desde e punto di bista di isolacion y comunicacion cu entre otro Hospital y Departamento di Malesanan Contagioso (DBZ), cu ta tuma otro medidanan pa loke ta e siguimento di detenido cu ta infecta. Tur esaki ta den protocol for di basta aña y no ta algo nobo aworaki, el a remarca.
Semper ta priorisa locual ta e diagnostico, contencion y e tratamento di e persona prome cu tin un bista general di locual ta sosodiendo, el a bisa.
E dokter a laga sa tambe cu tin tres caso activo di tuberculosis. E tres persona a wordo diagnostica y isola como tambe trata. Un di nan no ta na KIA mas. E ta pafo y ta bao di siguimento di DBZ.
Ta importante pa comunidad sa cu risico di infeccion ta minimal. E personanan cu ta detectando ta wordo investiga. El a enfatisa cu tin un diferencia grandi den loke ta tuberculosis activo y uno latente. Ora ta papia di tuberculosis su so ta crea panico den comunidad.
Ta compronde pa e personanan cu no tin e conocimento y e incertidumbre cu si nan tin un bishita of si nan ta bin cas cu verlof, si nan ta pega cu esey. P'esey ta brinda e informacion preciso. Tuberculosis activo ta pega ora un persona infecta ta tosa, nister, ta papia cu otro directamente y e ta hopi den contacto cu otro persona.
Pa un contacto so ta hopi improbabel cu ta bay pega cu e malesa, Dr. Rodriguez a subraya. Ta papiando akinan di un malesa cu ta pega, pero si e ta pega, e ta bay depende di e gruponan di risico tambe cu tin rond, manera personanan cu un sistema inmunologico deficitario of cu otro malesanan cronico.
E gruponan di risico aki ta controla na KIA. E situacion tambe ta controla, el a remarca.
E temporada cu a haci un 'contact tracing' pa e otronan cu ta den risico y cu tabata den contacto, e no ta di awe pa mañan. Por haci un test di PPD, cu ta un 'skin test' y e persona aunke e por ta infecta no ta bay sali positivo e momento ey. Por ta ta sali negativo, a bisa, pero esey no ta nifica cu e persona no tin e malesa of cu no a wordo contagia.
P'esey mes e protocolnan ta activa y despues di 8 siman ta haci un test un biaha mas y esey ta locual a bin sali e siman aki, cu tin 8 caso mas, pero no ta papiando di tuberculosis activo, e dokter a splica. Ta papiando di casonan positivo. Niun di nan ta sintomatico y ta studiando nan pa descarta cu por tin un tuberculosis activo den e 8 casonan aki.
KIA ta tumando tur e medidanan pa e contencion y pesey mes KIA a bay den 'lockdown' y no ta tumando detenidonan nobo aworaki. Locual a ofrece den conhunto cu DBZ y specialistanan ta pa cuminsa test e detenidonan cu ta bin di wardanan di polis pa no tin e risico di tuma nan cu infeccion.
E pashentnan cu tin no a bin for di un warda di polis malo. No por determina si tabatin un pashent cu tabatin tuberculosis activo y el a pega na e otro. Pero probablemente loke a pasa ta cu ora un persona ta yega cu e malesa y e ta un tuberculosis latente, e por desaroya e sintomanan eynan mes, e dokter a indica.
KIA ta poniendo tur e medidanan 'in place'. Tur empleado y detenido ta uzando mask specifico pa proteha mas efectivamente. Banda di esaki ta tumando e medidanan di desinfeccion y higiena, Dr. Rodriguez a duna di conoce.
