Director Erwin Lopez:
ORANJESTAD (AAN): Director di EPB San Nicolas, Erwin Lopez, a duna di conoce cu e problematica cu uzo di bebidanan mescla ainda tey y p'esey e ta pidi mayornan pa paga bon tino pasobra coleganan na scol a topa muchanan den botica ta cumprando algun producto y ora nan a wak e juffrouw nan a core bay.
Lopez a remarca cu esaki ta un 'trend' y no ta kere e ta bay stop asina lihe.
Esaki tambe ta tumando luga na otro scolnan. Na EPB a bay fo'i man y e muchanan a bira malo y na otro scolnan por ta nan no a bira malo pa esey sali den medionan di comunicacion. Pero cu nan ta bebiendo e mescla aki ta berdad, a bisa.
E producto ta hopi facil pa hay'e na supermercado of botica. E preocupacion relaciona cu esaki ta grandi pasobra esaki ta stroba enseñansa. E producto aki ta un substancia kimico cu ta cambia e manera di pensa y di siña. E ta wordo conoci como un droga y mescos cu otro tipo di droganan e ta causa alucinacion, causa problema y cu e mucha no ta studia bon, a enfatisa.
Erwin Lopez a agrega cu den e caso aki nan no a yama polis of FADA, pero si a pidi e docentenan pa papia cu e alumnonan y splica nan di e problematica y e risiconan.
Tur aña Carrousel ta tuma lugar caminda diferente organisacion ta bini hunto pa duna informacion na e hobennan. Esaki ta tuma lugar den luna di November, a bisa.
Aworaki e trend aki no ta wordo mira den cura di scol mas. Na EPB nan ta atento y e hobennan sa cu ta vigila. E no ta bisa cu 100% e no ta pasa, pero tin posibilidad pasobra no por controla tur loke nan ta bebe of nan container di bebida. "Pero cu nos ta alert, si y Dios danki cu e muchanan ta basha abao y esey ta yuda nos pa actua debidamente y na tempo", Lopez a duna di conoce.
