Prome Minister Evelyn Wever-Croes:- ORANJESTAD (AAN): “Pabien Aruba cu un gobierno nobo. Un dia hopi especial, un dia nobo, pa mi personal, un dia cu hopi emocion pasobra con cu bay bin ta trabaonan hopi duro y grandi nos a haci pa nos a yega asina leu.
Un periodo di formacion cu tabata hopi intensivo y cu a tuma hopi tempo aparte di tur e retonan di tur dia. Pa nos yega na e momento pa huramenta ta algo hopi bunita. Pa mi mes cierto momento ora mi ta wak mi coleganan nobo huramenta ta drenta mi un sentimento manera di mama. Mi ta resa pa tur cos bay bon y mi tey pa guia nan tambe y tambe e coleganan cu ta haciendo esaki un biaha mas”, tabata e palabranan expresa di Prome Minister Evelyn Wever-Croes despues di a huramenta dialuna atardi.
Prome Minister a enfatisa cu trece trankilidad den nos pueblo na unda mester trece trankilidad ta un prioridad pa Gabinete Wever-Croes II.
Enseñansa den e ultimo tempo tabata un area cu a trece poco turbulencia den nos comunidad y cu esaki, a trece preocupacion y intrankilidad. Cu e minister di enseñansa nobo, lo trece tambe un maneho nobo pa crea confiansa den e area aki. Educacion ta importante pa forma sociedadnan miho y fuerte. Exito den desaroyo di nos futuro generacion ta mara na e trankilidad den enseñansa di nos pais. Gabinete Wever-Croes ta compromete cu esaki.
Riba e tereno di maneho di Covid, Gabinete Wever-Croes II lo continua cu e trabounan cu a bin ta haci desde principio y lo sigui cu e maneho pa trece trankilidad cu mas conscientisacion pa asina cada biaha cu cifranan subi, Aruba no shutdown pa despues nan baha ta habri bek. Esaki sigur, segun Prome Minister, no ta un sistema cu nos por continua cu n’e. Gobierno ta studiando y considerando tambe otro modelonan pa wak con pa atende cu esaki na un forma diferente.
Trece trankilidad pa tur hende por enfoca riba nan rol den hiba Aruba padilanti. Un cos cu Gobierno lo traha mas riba dje tambe ta trece tur hende hunto. Aruba ta enfrentando retonan grandi. Nos no a sali for di e pandemia ainda y esey ta pone cu hunto nos mester haci’e. Gobierno no por haci’e su so, Prome Minister a enfatisa. Nos mester di sector publico, di sector priva, di Parlamento, di coalicion y di oposicion. Aruba mester di tur hende aworaki pa nos por bay padilanti.
“Awor cu Aruba tin un gobierno atrobe, pueblo di Aruba por ta sigur cu nos lo traha dia den y dia afo pa nos por trece e trankilidad cu lo hiba nos na progreso y bienestar cu mester trece bek. Aruba ta pasando den retonan grandi. E pandemia a dal henter mundo duro pero aki na Aruba nos ta enfrenta tur reto manera nos a yega di enfrenta caba. Nos por enfrenta esaki si nos uni. Ban haci’e pasobra nos ta stima Aruba, nos ta stima nos famia y nos ta stima nos mes. Hunto nos ta logra”, Prome Minister a enfatisa.
