ORANJESTAD (AAN) – Nicole Godett, Trahador Social na Trayecto Formacion Social (STV), ta duna e guia y ta sostene e hobennan durante e aña, den colaboracion cu nan famia di e muchanan, pa asina e aña cana smoot.
Den entrevista cu DIARIO, Godett a menciona cu e parti di comunicacion ta hopi grandi na STV, y nan mes ta pidi e muchanan duna nan parti di kico nan ta interesa den dje, pa asina e curso wordo sluit aan na nan expectativa y e ora ey nan tin un “keuze” (opcion) den kico tur nan kier siña durante e aña, no solamente di parti di e opleiding pero di nan mes, kico nan ta haya falta di dje den nan bida diario.
Godett a señala cu e grupo cu tin awo ta hopi leuk, nan no ta timido pa bisa kico nan gusta y kico no, nan ta siña conoce nan mes, nan ta coopera y nan ta pasa hopi bon como grupo pa crea nan metanan pa futuro.
El a splica tambe cu ora e hobennan ta drenta den e curso, nan ta wordo puntra den ki area nan ta interesa di bay, pasobra ta hopi importante pa nan tuma un direccion unda e hoben kier bay y kico e kier siña y unda e kier haya experiencia, y STV ta koppel esaki. Godett a bisa cu e aña aki e koppeling a bay basta bon.
Tin companianan grandi cu a habri porta pa e hobennan y nan ta haciendo un hopi bon trabao, y a yega momento cu e grupo ta den caba y nan tin oportunidad hasta di haya un trabao. “Pues pa nos ta un orguyo profundo. Dus mi ta agradecido cu nos ta hayando esey, y mi ta pidi pa comercio keda habri nos hobennan, pasobra nan por bira trahador ehemplar den empresa”, Godett a bisa.
Durante cu e hobennan ta core stage nan ta sigui haya guia di SVT y empresanan ta un linea cortico cu semper por papia cune pa haci stage bezoek, y cualkier momento, SVT semper tey pa nan. Godett a indica cu e periodo di stage ta dura ocho luna largo, e hobennan ta bay tres biaha pa siman.
