Richard Frank di Asociacion VWI
ORANJESTAD (AAN): E trahadornan den WEB Aruba NV cu tin un contract individual di trabao, y cu ta forma parti di Vereniging van Werknemers met een Individuele Arbeidsovereenkomst (VWI), a reacciona riba loke Utilities Aruba NV kier haci pa lanta un otro Parke di Molina e biaha aki den area di Rincon.
Segun Asociacion VWI, e asunto di e Parke nobo di Molina aki ta ‘puro show’.
Esey ta loke Richard Frank, kende ta presidente di Asociacion VWI a indica durante un conferencia di prensa. El a bisa cu nan a mira con Ton Rojer di Utilities Aruba NV ta coriendo “un road show” na radio y prensa riba e famoso “Expresion of Interest” cu nan tin riba expansion di proyecto di Molina di Biento.
VWI a sigui varios di su declaracionnan na radio y den prensa, y nan ta haya kizas ta great cu Sr. Rojer ta dunando e show aki, pero lamentablemente e director no ta trece full e storia dilanti manera cu e ta.
Riba esey Asociacion VWI a trece nan reaccion na prensa, pa debunk parti di e storia di Rojer cu e no ta contando pueblo total, y nan mes tin 3 punto di preocupacion.
1er Punto: Segun VWI, nan prome preocupacion a wordo treci den prensa caba, unda Utilities Aruba NV ta actuando den violacion di su meta stipula di su Statutonan y ehecutando actonan cu e no tin permiso pa haci.
Frank aki a mustra copia di statuto di Utilities Aruba NV, di nan meta, y pakico nan tin permiso of no. E meta di e compania no ta encera e actonan cu nan ta haciendo aworaki pa core haci aanbesteding y EOI pa cu e proyecto, etc., y tampoco e permiso cu nan tin ta permiti esaki di acuerdo cu e copia di permiso cu tin den e Ministeriele Beschikking.
Utilities Aruba NV y Rojer ta papia continuamente di un “Utilities Group” paki y paya, siendo cu esaki no ta existi na Aruba. Loke si ta existi ta Utilities Aruba NV, WEB Aruba NV, y NV Elmar. Esey ta e entidadnan legal cu ta existi. Un ‘Utilities Group’ of ‘Utilities Groep’ no ta existi na Aruba mes.
Loke Utilities Aruba NV su intencion tabata na comienzo di decada di 1990, ta cu den renobacion di WEB, a traha e constelacion di WEB cu Utilities y Elmar, hustamente pa Utilities forma un buffer entre politica y e companianan nobo estatal aki.
Lamentablemente den ultimo 15 añanan, e rolnan a bira net lo contrario unda cu envez cu Utilities ta mantene politica na un distancia, awor mas bien ta trece politica den tur e companianan estatal di utilidad.
