ORANJESTAD (AAN): Siman pasa na ciudad di Coro na estado Falcon, a tuma lugar reunion di Camara di Comercio y un di e topiconan cu a discuti riba dje ta e reapertura di frontera cu islanan Aruba, Bonaire, y Curacao.
E president di e Comision di Camaranan Binacional di Fedecamaras, esta Moises Bittan, a confirma via zoom-meeting durante e presentacion di e Camara di Comercio regional na Coro, cu realmente no tin ningun avance pa reapertura gradual ni completo di e frontera entre Venezuela y Islanan ABC.
Segun e president di e Comision, ta haciendo un trabao gradual riba esaki, pasobra nan sa cu tin resistencia cu ta bin for di e sector comercial, y pesey te ainda no a logra di kita e obstaculonan ey pa asina habri conexion. Pesey nan lo sigui haci un trabao di acerca autoridadnan Venezolano y tambe esnan di Hulanda, pa mira con pa gradualmente recupera e relacionnan.
El a splica cu nan sa bon, cu e conexion di estado Falcon pa Caribe y Europa lo start bek unavez cu nan restablece intercambio turistico y comercial cu islanan ABC.
E negociacionnan pa un reapertura pronto di e fronteranan aki cu islanan ABC mester sigui envolviendo tur dos Gobierno y elimina cualkier tipo di obstaculo.
Tin di traha for di e punto di bista di e ser humano, di e ciudadanonan cu ta na e islanan cu kier productonan di agricultura di Venezuela, pasobra nan lo yega eynan cu mihor prijs compara cu loke Aruba ta importa via avion of container. Aruba lo beneficia di e calidad y frescura di e berdura y frutanan Venezolano, y e comercio Venezolano lo beneficia e productornan di agricultura cu ta haya e ora un mercado adicional.
E Venezolanonan ta pensa cu tin di separa e politica di economia for di e conflicto diplomatico entre e dos paisnan. Pues nan kier traha hunto pa asina logra habri bek e frontera aereo y maritimo.
Ta ser bisa cu Hulanda ta wardando riba Gobierno di Nicolas Maduro pa tuma decisionnan corecto pa acelera e apertura. Te cu awor, ainda Fedecamaras no a wordo pidi door di Gobierno pa papia di e tema aki. Nan ta desea di haya un invitacion pa asina nan por duna nan opinion riba e importancia di habri bek frontera cu e islanan ABC.
No obstante tur e combersacionnan aki, keto bay tin diferencia, tension politico, y diferente aspecto cu ta complicando e chens pa yega na un acuerdo entre e islanan y Venezuela.
Ministro di Buitenlandse Zaken di e Gobierno nobo di Rutte, esta Wopke Hoekstra, a confirma cu e discusionnan entre Hulanda y Gobierno di Caracas pa habri frontera aereo y maritimo bek a bira complica, pasobra Aruba y Curacao no ta comparti e mesun punto di bista riba e tema aki.
Toch tin informacion cu e Consulnan Honorario nobo di Hulanda awor na Venezuela, cu tin sede na Punto Fijo, Porlamar (Isla di Margarita), Maracaibo, y Puerto Cabello ta trahando pa logra un acercamento nobo entre e partidonan.
