Minister Ursell Arends:
*Ta un prioridad pa pusha sector primario y emision di tereno pa agricultura
ORANJESTAD (AAN): Den conferencia di prensa, DIARIO a puntra Minister Ursell Arends, encarga cu sector primario, cual ta e plan di gobierno pa loke ta terenonan destina pa agricultura.
El a indica cu esey ta un di e prioridadnan cu a fiha pa canalisa e aña aki. A combersa caba cu Minister di Infrastructura, esta Prome Minister, mirando cu tin inversionistanan local cu ya caba tin fondonan disponibel sea pa inverti den 'chicken farms' of den proyectonan di agricultura.
Sinembargo, a bisa, e limitacion cu ta keda existi ta tereno. P'esey tin palabracionnan concreto pa loke ta trata ROP y ROPV, cu ya caba ta indica cual ta e terenonan cu por wordo uza pa loke ta trata sector primario.
Arends a agrega cu aworaki Santa Rosa lo traha riba e peticionnan aki y duna advies na DIP y DIP lo canalisa esaki a traves di e consehonan cu nan lo ricibi di Santa Rosa. Esaki ta e formula cu ta canalisando na e momentonan aki.
E mandatario ta spera cu dentro di poco por anuncia adelanto riba e areanan aki, mirando cu esaki ta un prioridad di pusha sector primario y e parti di tereno.
Relaciona cu esaki, Minister Geoffrey Wever a indica cu agricultura tradicional ta rekeri terenonan hopi mas grandi cu agricultura innovativo. Awendia, e productonan di lechuga tin un tereno hopi limita. Pa e motibo ey y pa e motibo di tardansa den emision di tereno, a cuminsa traha riba e idea di Agri Innovation Park caminda a haya dos plot grandi cu ta bay verkabel y hinca nan den plotnan mas chikito. Hunto cu 'green houses' por tin un produccion mas optimal riba un tereno mas chikito.
E parti cu gobierno ta enfocando riba dje ta pa e proyectonan aki sali pa dilanti. Esey ta algo cu ta hopi avansa caba cu ta spera cu den curso di e aña aki por lansa Agri Innovation Park pa duna na un forma mas acelera e plotnan na empresarionan den agricultura, Minister Wever a bisa.
