Frans Ponson, Presidente di CUA:
ORANJESTAD (AAN) Frans Ponson, presidente di Comerciantenan Uni Aruba (CUA), a sigui splica den entrevista cu DIARIO, cu despues di e video cu nan a presenta y cu a cay den hopi bon tera den gobierno y hasta den seno di KPA, nan tabata tin reunionnan.
“Nos ta hopi contento, nos mester bisa cu nos a haya yamada, e miembronan a sinta cu polisnan caba, nan a yama CUA tambe pa sinta cu nan, kiermen el a cay den hopi bon tera y nos no por laga esaki cay”, Frans Ponson a señala.
E ta lamenta cu Gobierno aworaki a cay, pero nan a palabra cu ne, y CUA a haya hopi bon feedback di polis, cu a sinta cu e miembronan di biaha.
“Mi ta spera cu nos por dialoga di biaha cu e gobierno nobo, pa no laga esaki cay, y pa zorg pa sigui. Pero na momento cu nos a sali cu e situacion, nos a haya bon atencion y tur e departamentonan kier a duna un man. Kiermen, ora bo presenta tanto proyecto asina aki nan ta wak cu aworaki si ta algo serio cu tur hende kier forma parti di e cambio aki. Nos ta spera cu esey bay pasa asina”, Frans Ponson a subraya. El a reitera cu CUA ta spera cu manera gobierno nobo sinta nan por pick up e proyecto di Caya Grandi, y a subraya cu tin hopi interes den dje.
“Mi a compronde di un miembro caba cu for di October e ta cuminza y esaki ta un hopi bon noticia pa e aña aki!” Frans Ponson a expresa.
El señala cu awo cu nan a mira loke e comerciantenan a presenta, tur hende a haya smak. “E hendenan a cuminza pidi pa tereno, banconan ta yama mi atrobe. Nan kier sa ken nan ta, nan kier sinta cu nan. Pa nos loke a pasa ta hopi, hopi positivo. Kiermen, ami conociendo un miembro cu a bisa mi cu ne lo cuminza na October, mi ta kere e ta hopi positivo”, Frans Ponson a declara.
