Segun Minister Ursell Arends:
ORANJESTAD (AAN) – Minister Ursell Arends a comenta, den entrevista cu DIARIO, cu desde cu Serlimar a haya bakinan nobo, tur dia ta hayando clientenan nobo tambe, y asina tin diferente adelanto cu e compania aki ta logrando. Minister Arends a describi algun di nan.
E mandatario a indica cu desde cu a introduci AFAS (Software) den Serlimar, e porcentahe cu nan ta colecta tambe a subi. Sigur tin espacio pa mehoracion, e minister a bisa, y e management di Serlimar tambe trahando continuamente riba esaki.
Pa loke ta trata e “ziekteverzuim” di e trahadornan, esaki ta un aspecto cardinal cu e compania ta trahando riba dje. El a splica cu no solamente na Serlimar tin e situacion aki, pero tambe na Arubus cu ta cay tambe bao su ministerio, y ademas na SABA. Eynan tur tin absentismo door AO, halto. El a señala cu algo cu e ta atende cu esnan cu ta bao su ministerio p’asina aki trece mehoracion riba e aspectonan aki tambe.
El a agrega cu pa loke ta trata e “personeelbestand” eynan tambe el a atende cu ne, mirando cu e rapport di PWC mes ta analiza cu na Serlimar tin mas trahado cu na Serlicor y Serlibon hunto.
“Nos ta atende cu esaki, y zorg cu e cantidad di ploegnan cu ta traha na Serlimar tambe bay over na otro instancianan, cu ta dunando servicio pa mantene Aruba limpi, limpi. Un di nan ta BCI (City Inspector), unda un total di seis ploeg a bay, tambe na ACF (Aruba Conservation Foundation), y tambe na Santa Rosa. Pues, na e forma aki a aloca e ploegnan pa kita e peso financiero cu tabata tin den Serlimar”, Minister Ursell Arends a señala.
