ORANJESTAD (AAN) – Den e luna di Augustus aki, Tienda di Educacion a haya un directora nobo,
den persona di señora Romely Flanegin. Den entrevista cu DIARIO el a duna di conoce cu e Tienda ta den un proceso di pleno restructuracion.
Flanegin a splica cu esaki a cuminza for di Januari caba, cu un directiva nobo. Pa Januari 2024 e directiva a cuminza sinta, y asina nan a pone plannan riba papel pa hiba e Tienda na otro nivel y trec’e bek den comunidad.
Di e manera aki hacie duidelijk den comunidad pero tambe na otro fundacionnan kico nan rol ta, y unda nan ta para como Tienda di Educacion.
Un di e temanan cu mester duna mas atencion ta lantamento di yiu, cu ta un tarea y responsabilidad hopi grandi, no solamente pa mayornan pero tambe pa e educadornan.
“Bo ta keda mira e necesidad pa haya ayudo y conseho di profesionalnan con pa trata cu cierto situacionnan. Por ehemplo, hobennan ta un topico cu ta bin dilanti hopi, mayornan ta bisa cu tin crecemento y cu nan ta cambia den comportacion of actuacion, of tin mal amigo, y ta puntra con nan por trata cu esaki. Esaki ta temanan cu constantemente ta keda bin dilanti”, Romely Flanegin a señala.
E temanan cu ta bin dilanti ta varia pa famia. Cada fase di crecemento di mucha ta exigi otro manera di crianza of di trata cu e yiu. “Y nos ta hay’e no solamente di mayornan, pero di educadornan tambe cu ta bin cu preguntanan, por ehemplo, cu nan yiu ta demotiva, con nan por motiva nan, con nan por haci pa motiva pa nan sigui studia y cama den e bon caminda. Nos ta busca, mirando cada cas, cada situacion, con nos por yuda di e miho manera posible”, señora Flanegin a expresa.
El a indica tambe cu tin hopi mayor hoben cu ta acerca Tienda di Educacion, y nan ta esnan cu ta topa cu mas reto, mirando cu tin hopi responsabilidad cu kizas nan mes no a haya cierto guia, anto e ta bira dificil pa tambe nan brinda e yiu cierto guia. “Anto esey ta e grupo meta cu hopi biaha mester di un ayudo of sosten, y p’esey Tienda tey tambe”, Flanegin a señala.
Den e caso aki tambe ta sosode cu un mama hoben cu un baby recien naci y aunke, naturalmente tin Wit Gele Kruis, y otro instancianan, pero asina e yiu ta crece ta bin otro preguntanan, cu hende ta kere e mayor sa automaticamente, pero e no t’asina. Pasobra tin biaha tin cosnan simple cu e mayor no sa con pa trata of anda cu ne, segun señora Flanegin a señala.
Manera ta conoci Tienda di Educacion su liña di sosten cu 161.
