NEW YORK: E laboratorionan cu ta procesa PCR Rapid Test pa Covid-19 den henter e ciudad, y estado di New York,
ta tarda hasta 11 dia prome cu nan duna resultado. Y esey a pone cu riba Diamars, Fiscal di New York a duna ordo pa nan stop di pasa propaganda falso, cu nan ta priminti resultado den 24 of 48 ora.
Esaki ta di cinco biaha cu Fiscal Letitia James ta manda mensahe di advertencia na diferente Laboratorio cu ta haciendo e PCR test aki, pasobra a bin haya keho di dos di nan, esta EZ Test NY y tambe Keep Health Safe, cu ta tardando siete dia, y den algun caso hasta 11, pa entrega resultado di e testnan.
Fiscal a corda nan, cu esaki ta igual na haci “promesa falso cu nan no por cumpli cune,” net awor cu e casonan positivo ta subiendo drasticamente causa pa e variante di Omicron, debi na hendenan cu a keda contagia durante dianan di fiesta.
E tardanza aki tambe ta poniendo cu hopi Mericano cu ta planeando di bay cu vakantie na e.o. Caribe, ta keda obliga na cancela tur esaki. Pasobra si bo no tin un PCR Test negativo, e aerolineanan no ta lagabo subi avion.
