Laura Luces:
ORANJESTAD (AAN): Diadomingo awor dia 28 di Juli ta bay tuma lugar eleccion na Venezuela, pa eligi un presidente nobo di e pais.
Relaciona cu esaki, e grupo ‘Con Venezuela Aruba’ a organiza un conferencia di prensa, pa splica con e votamento pa e Venezolanonan biba na Aruba ta bay tuma lugar.
Durante e conferencia di prensa DIARIO a puntra Laura Luces con diferente e eleccion aki ta bay ta, compara cu diferente otro eleccion na Venezuela unda cu a papia cu fraude y miedo di bay vota.
“Semper tabata tin fraude, sigur tambe ora cu Hugo Chavez tabata presidente, unda cu via diferente institucion di gobierno, el a tuma mando di tur cos”.
E biaha aki tambe te ainda no ta un eleccion husto pasobra pa cuminza, nos como Venezolano no por vota pa nos candidato Maria Corina Machado.
Pesey nos candidato di ‘Con Venezuela’ a bira Edmundo Gonzalez Urrutia.
Esaki segun Luces, kende a indica cu sigur ta bay tin fraude, unda cu gobierno actual di Venezuela ta bay purba tur cos posibel y imposibel pa nan keda na poder.
Sinembargo, el a splica cu e biaha aki e gobierno di Maduro no tin mas e base social, riba cual nan por a depende den pasado.
“E biaha aki nos tin locual nos ta yama e defensornan di voto y nos ta bay ta eynan pues ta conta y confirma nos votonan”.
Nos ta bay conta papel pa papel y banda di esaki e testigo di voto no ta bay tey su so manera tabata sosode anteriormente.
E biaha aki danki na 600K nos tin un organizacion brutal via cual nos ta bay compaña e testigonan di mesa pa nan no sinti nan mes nan so.
Nos ta bay tin nan na cada mesa electoral, segun Luces.
