Basta dia pasa DIARIO a lansa advertencia pa e situacion na Aruba --- *Creacion di instabilidad despues di e colapso debi na Covid-19 ta fatal --- *Ningun interes politici of di otro grupo lo beneficia di intrankilidad
ORANJESTAD (AAN)- Tin un momento pa cada cos den bida. Esaki ta un sabiduria basico cu ta wordo pasa di un generacion pa otro como parti di educacion basico na school y na cas.
Aparentemente tin hende cu ta tene na cierto interesnan, cu no por comprende cu si un pais zink, nan ta zink hunto cu e pais, a menos cu nan tin nan pasashi prepara pa bandona e pais of nan a percura di yena nan saco di tal forma, cu nan por pasa un tempo sin hala mas placa aden pa nan por come steak.
Un situacion serio, egoista, di abuso y di teror ta presente y ta sigui crece na Aruba, caminda instabilidad, di intrankilidad, di teror ta wordo crea na un momento fatal pa e pais.
Na 2020, Covid-19 a destrui Aruba, cu ya tabata biba cu un herencia cu a casi a mata futuro di Aruba y a laga un peso como herencia pa futuro generacionnan.
Aruba mester a traha un plan di recuperacion den cual no tin lugar pa terorismo ni mente maligno cu ta actua contra bienestar di e Arubiano.
Ta increibel cu Aruba ta wordo confronta cu mentenan carga cu malicia cu ta destrui e cabelnan cu mester comunica Aruba cu mundo, cu cantidad di competidor pa e pais.
Mester papia di terorismo ora deliberadamente ta destrui cabelnan cu funcion sumamente importante di internet.
Aruba mester di comunicacion cu exterior pa su turismo, pa su comercio, pa bida di cada di dia, pa su cas di famia. Mescos cu henter mundo, Aruba y e Arubiano ta dependiente di e cabelnan cu mentenan perverso ta destrui den e ultimo etapa di destabilisacion di Aruba.
Kico kier alcansa? Esaki ta e pregunta cu ta bini dilanti. Na fin di luna a causa problema serio pa un comunidad cu mester mira con e ta sigui atende cu problemanan cu e pandemia a produci.
Kende a wordo perhudica? Gobierno? Politiconan cu esnan pafor di Gobierno kier reemplasa?
Kico ta pasando cu Aruba? Kico cierto gruponan kier haci cu Aruba?
Awor si nos mester lansa e preguntanan aki pasobra ta obvio cu mester cuminsa papia di abuso contra un comunidad, cu continuamente no por ta trankil den un pandemia cu a dal tur cas riba Aruba.
Kico kier saca for di destabilisacion di e pais? Terorismo verbal no ta suficiente. Mester di mas pa destrui un pais, cu a duna tanto hende oportunidad pa sinti nan mes importante?
Awe palabra a caba.
Autoridad mester haci tur intento pa detene e malvadonan tras di e destruccion di di cabel cu ta nifica cu Aruba mester pone mas placa riba mesa pa asina reparacion di e comunicacion.
E constante agresion cu ta manifesta su mes den mundo politico, cu a baha na e nivel mas abou cu por existi, mester yega na un fin. Un mentalidad funesto ta wordo propaga.
Aruba a sufri hopi na man di mundo politico, na man di partidonan cu a probecha di Aruba y a lastima Aruba, kibra Aruba, laga Aruba atras den estado di bancarota prome cu e pandemia a bira colapso pa Aruba.
Aruba a sobrevivi na 2020. Aruba a sigui cana na 2021. Awe kico?
Mester evita cu Aruba por lanta para riba su propio pia? Pakico?
DIARIO awe ta mensahero di tanto Arubiano angustia cu a cansa. Esaki ta loke kier alcansa? Cu hende ta cansa y cu hende ta bay comete acto criminal contra Aruba, cu ta e victima final di e mentalidad cu ta wordo propaga pa crea instabilidad pa un grupo cu ta manera cayman na boca di rio?
E prome luna di 2022 ta cera na un forma sumamente tristo. Mester saca pia, mester destrui, mester bira terorista y asina destrui un pais cu mester di paz y trankilidad pa atrae turista y inversionista y asina hiba e pais atrobe na e nivel cu e pais tabata prome cu e grupo elitario, cu ta kere cu ta di nan Aruba ta, a destrui Aruba.
