ORANJESTAD (AAN): Informacion di Bonaire ta indica cu e aña aki, Taskforce di Reino pa Derecho di Mucha ta celebra su di 10 aniversario cu un conferencia di trabao.
E conferencia di trabao, cu lo tuma luga di 13 pa 16 di mei na Bonaire, lo sirbi como un momento di refleccion riba logronan alcansa durante e 10 añanan y pa alavez wak pa dilanti a base di e metanan di Taskforce. Un elemento importante ta desaroyo di e cuadro strategico di forma conhunto.
E enfoke di e conferencia di trabao lo ta riba e plannan di accion di, y acuerdo di colaboracion entre e seis islanan, basa riba e strategia pa 2023-2028. E metanan strategico aki ta basa riba e puntonan di enfoke stipula den e MoU firma pa e paisnan y entidadnan publico di Reino na October 2023 na Curaçao. E MoU aki ta un prolongacion di e MoU inicial firma na 2018.
Durante e ultimo 10 añanan Taskforce a logra varios resultado concreto riba e seis islanan di Reino. Algun ehempel ta: firmamento di un convenio pa implementacion di un plan strategico cu ta promove cooperacion, ehecuta pa medio di Centro pa Hoben y Famia na Aruba, participacion activo di hubentud den desaroyo di e maneho pa hubentud nobo di Bonaire, lantamento di un plataforma di hoben na Curaçao, lansamento di Telefon pa Mucha na Saba, introduccion di un tienda di educacion na St. Eustatius, y desaroyo di un programa di educacion na St. Maarten.
Tocante Taskforce: Taskforce su historia ta bay back te na e Conferencia di Reino cu a tuma luga dia 2 di april 2014 na Aruba. Durante e conferencia aki, mandatarionan di Reino a enfatisa cu cada mucha den Reino tin derecho riba un bon infancia, manera stipula den e Tratado Internacional pa Derecho di Mucha (IVRK).
E Conferencia di Reino a conduci na lantamento di Taskforce, cu e meta pa stimula cooperacion riba tereno di derecho di mucha den Reino y pa mehora implementacion di derecho di mucha den parti Caribense di Reino. Taskforce ta consisti di representantenan di hubentud y famia di Aruba, Bonaire, Curaçao, Saba, St. Eustatius, St. Maarten, y representantenan di Ministerio di Asuntonan Interno y Relacionnan den Reino (BZK) y Ministerio di Salud, Bienestar y Deporte (VWS). UNICEF Hulanda ta Taskforce su consehero.
