Director di ATIA, Herrick Henriquez - *E expectativa ta cu e prijsnan lo subi mas
ORANJESTAD (AAN): Director di Aruba Trade & Industry Association (ATIA), Herrick Henriquez a indica den conferencia di prensa cu for di basta tempo caba nan ta observando di cerca e asunto di aumento di prijs di importacion.
Nan ta bezig ta wak di cerca e situacion aki y na Mei ATIA a saca un comunicado di prensa relaciona cu e aumento di prijs di productonan local.
Ta wak cu e prijsnan ta subiendo mas y mas y e temporada di Pasco ta yegando. E expectativa ta cu e prijsnan lo subi mas, a expresa.
Tin tres razon pakico e prijsnan ta subiendo mundialmente. Un di nan ta 'supply chain disruption', e di dos ta e scarcedad di productonan pa benta y e di tres ta e aumento den e prijs di flete (freight maritimo y continental).
Henriquez a splica cu e 'supply chain disruption' ta ora un producto wordo traha for di materia prima te ora e yega den man di e consumidor. Fabricacion, transportacion, etc tur esey a wordo afecta door di Covid-19.
Durante e pandemia a pasa algun cos interesante, a señala. Hopi compania no tabata sa kico ta bay pasa den futuro y nan a cuminsa 'skill down'. Ora e demanda a cuminsa subi tabata dificil pa nan 'skill-up' atrobe y haya empleadonan nobo.
Esey a causa e ora ey cu a yega na scarcedad di producto y ora tin scarcedad di producto prijs ta subi, Herrick Henriquez a indica.
Ora cu e demanda ta subi prijs ta subi atrobe. Por ehempel, hand sanitizer, prome tabata un producto di luho, pero aworaki tur hende tin hand sanitizer den nan tas. Mescos cu a tapabocanan cu e prijsnan a subi y e produccionnan a subi, a bisa.
Pa loke ta e parti di flete (freight), esaki a subi door di algun problema cu tin mundialmente y e problema principal ta cu no tin containers. Door cu tin scarcedad di containers, e prijs pa transporta productonan di China, Merca of Europa pa tur caminda na mundo, incluyendo Aruba a subi. Ademas cu no tin basta espacio den e containernan pa e productonan yega na nan destinacion, a remarca.
Tin un otro aspecto, a menciona. Tin algun waf na China cu aworaki ta cerando. Tin un lista di spera hopi mas largo den e wafnan. Normalmente, un barco cu ta drenta den dos pa tres dia e ta sali y aworaki tin te hasta un lista di spera di 7 pa 10 dia.
Aworaki no tin mas un barco di Hulanda cu ta bin directo pa Aruba. Awor ta bin of via Jamaica of Cartagena.
Tur esaki ta cosnan cu ta subiendo e prijsnan te na Aruba, e director di ATIA a splica.
