ORANJESTAD (AAN): Diahuebs mainta a tuma luga e reunion publico den Parlamento di Aruba pa trata COHO. Prome Minister Evelyn Wever-Croes den su disertacion a informa Parlamento
di e pasonan cu Gobierno a tuma pa asina keda cla cu e negosacionnan cu Hulanda despues di 13 luna.
Awor tin un consensus entre Aruba, Corsou, Sint Maarten y Hulanda riba e textonan di COHO. E siguiente paso ta pa pidi Raad van Advies e conseho riba e ultimo draft di e ley aki. Dia 3 di September ta bay Conseho di Minister di Reino y despues e documentonan ta bay Parlamento.
“Reunionnan ta intenso. Nos ta tuma esaki hopi na serio. Nos punto di salida semper tabata cu nos ta sigui dialoga, nos ta keda na mesa pasobra ta aisna nos por yega na otro y purba crea e confiansa cu bo tin mester ora bo ta presta asina hopi placa di un partner y cu bo tin cu bay paga bek. E no ta facil pero mi mester bisa cu e ta un orguyo hopi grandi cu nos tin un ekipo hopi profecional den gobierno cu a yuda gobierno cu esaki”.
Pa loke ta e COHO e diligencia tabata den man di Directie Wetgeving y Juridische Zaken; Sr George Croes, Sr Carlos Guaimo y Sra Mariska Koolman. E parti di RAFT tabata den man di Directeur di Finanzas sr Derick Werleman, Sra Joanne Kock y sr Chito Paris. Den esaki a haya asistencia enorme di consehero di Minister di Finanzas, sr. Nilo Swaen y Sra Indra Zaandam cu ta e representante di Aruba den e tijdelijke werk organisatie como liaison entre Aruba y Hulanda. Esaki ta e ekipo cu haci e trabou.
“Ami tabata sinta na mesa ora cu Secretario di Estado Knops tabata na mesa pero mayoria di e trabou tabata haci riba e nivel ‘ambtelijk’ pa e profesionalnan di Aruba mes. E punto di salida ta cu nos ta keda na mesa, nos lo keda dialoga fuerte y asina nos por a saca e miho resultadonan pa Aruba”, Prome Minister Evelyn Wever-Croes a expresa.
