CEO di Oficina di Turismo:
ORANJESTAD (AAN): Ronella Croes, CEO di Oficina di Turismo di Aruba a indica cu pa loke ta carnaval 70, Aruba a luci. Tabatin hopi prensa internacional tambe compara cu otro añanan mirando cu tabata un celebracion special.
Ta gradici tur cu a haci un tremendo trabao pa logra esaki, Croes a expresa
Aworaki ta continua mirando un prome kwartaal di 2024 exitoso. Aña a cuminsa fuerte y ta den un temporada halto como turismo y no tin niun factor cu ta pon'e pensa aworaki cu no lo sigui mira esey den e kwartaalnan cu ta sigui, a indica.
Croes a sigui bisa cu ta haya for di socionan den mercado loke ta pasando, con e negoshi ta moviendo y loke ta e cantidad di asiento aereo. Tin un adelanto basta fuerte compara cu e prome kwartaal di 2023 den asiento.
Por ehempel, sa cu LATAM Airlines despues di 6 siman ya caba a bisa cu ta bay pone frecuencianan adicional riba e ruta di Aruba. Avianca tambe a introduci e ruta di Medellin. Tin hopi cos cu ta move den direccion desea di e banda ey, y kisas mas fuerte di loke e spera, a bisa.
Ronella Croes a declara tambe cu banda di esaki tin e otro indicadornan. Por premira un aña caminda esey lo por sigui ta e tendencia y lo sigui traha hopi riba loke a menciona caba.
ATA ta bay keda den movecion internacionalmente y enfoca tambe riba e producto turistico. ATA lo sigui inverti den diferente proyecto, a agrega.
