Minister Presidente Evelyn Wever-Croes: --- *76% di populacion general ta vacuna
ORANJESTAD (AAN): Premier Evelyn Wever-Croes a remarca dialuna mainta den conferencia di prensa cu tur ciudadano mester tene cuenta cu algun desaroyo cu ta tumando lugar den e dianan aki.
Medida adicional di Merca
Pa tur esnan cu ta viaha of tin pensa pa viaha pa Merca, ta importante pa tuma nota riba e medida di mas nobo cu Merca a introduci: Entrante 8 di november bo por bay Merca solamente si bo ta vacuna.
Esaki no ta un regla di Aruba, e ta un regla di Gobierno di Merca. E exigencia aki ta encera cu bo mester tin tur dos vacuna y mester ta mas cu 14 dia cu bo a ricibi e di dos vacuna, pa bo por viaha pa Merca. Tin algun excepcion pa muchanan cu no por vacuna y algun excepcion humanitario.
Grado di vacunacion
Pa locual ta trata e porcentahe di populacion cu ta vacuna, Prome Minister a duna di conoce cu ta mira aumento den e grado di vacunacion. 76% di populacion general ta vacuna y esnan riba 60 aña ta 84% vacuna.
Mester remarca tin 3000 persona cu a haya nan prome vacuna pero cu a lubida di bay busca e di dos vacuna pues ta pidi pa e grupo aki bay vacuna.
Vacuna ta e unico arma cu te ainda a prueba di por frena e pandemia y evita cu hende ta bira hopi malo.
Pa finalisa Premier Wever - Croes a expresa: “Gobierno, Aruba y e grupo di esnan vulnerabel ta conta cu bo. Si aworaki nos duna di nos parti, fin di aña lo por tin un temporada cu ta mas trankil, mas stabilisa y cu turismo por sigui crece pa nos economia por sigui crece. Ban hunto biba mas saludabel y traha riba nos sistema inmunologico pa bringa tur griep y malesa. Aruba ta di nos tur. Hunto nos ta recupera”.
