Señor Hose Figaroa di FTA:
- Si no regula lo tin un efecto hopi fuerte riba e balor di vivienda na Aruba
ORANJESTAD (AAN): E fenomeno di Vacation Rentals no ta algo cu ta data for di awo. Tin un raport di por lo menos 5 aña pasa caba traha na Hulanda den cual entre otro ta menciona cu e cantidad di camber disponibel na Aruba pa turista den sector di ‘vacation rentals’ ta mas grandi cu den e sector hotelero. Asina señor Hose Figaroa di FTA a duna di conoce.
Segun e, ta logico cu na momento cu no regula e sector di vacation rentals, e lo sigui crece y lo por tin un efecto hopi grandi riba turismo. Sinembargo, señor Figaroa a enfatisa, cu segun e, te ainda por constata cu e economia y turismo di Aruba a sa di balansa esaki, na unda cu, aunke cu e sector di vacation rentals ta crece, e no ta afecta hopi e sector hotelero.
Esaki, segun e, ta demostra den e cifranan di ocupacion cu ta keda halto. Tambe, e sector di vacation rentals ta brinda servicio na un otro sector di nos economia. Bisando esaki, e ta enfatisa cu no mester elimina vacation rentals, pasobra otro sectornan, entre otro restaurantnan pafo di hotelnan ta beneficia di e sector aki. Supermercadonan y companianan cu ta maneha vacation rentals tambe ta benificia di e sector aki.
Señor Figaroa sinembargo a enfatisa cu loke si ta importante ta pa regula e sector di vacation rentals pa tin mas control. Sector hotelero ta regula y ta mara na un cantidad di camber cu mag di tin of cu por agrega. “Sector di vacation rentals no tin niun sorto di control pasobra no tin regulacion riba dje. Ta importante pa riba corto plaso, bin cu regulacion riba e sector aki, no pa elimin’e pasobra el a demostra cu e ta un sector cu ta draai”, el a subraya.
Figaroa e enfatisa cu no solamente mester regula esaki pa turismo, sino pa un otro fenomeno na Aruba, cu ta e prijs di vivienda. Prijsnan di cas a subi den forma exhorbitante door di e fenomeno di vacation rentals.
Un problema ta cu door di e sector di vacation rentals, hendenan di afo ta cumpra casnan na Aruba, no pa biba sino pa haci negoshi cu ne. Nan no ta importa e balor di prijs di taxatie pero ta duna mas importancia na con lihe por recupera e inversion haci pa despues haya ganashi.
“E manera cu ta wak e balor ta totalmente diferente na momento cu ta inverti cu na momento cu ta biba. Mientras cu no regula e sector di vacation rentals, e lo tin un efecto hopi fuerte riba e balor di vivienda na Aruba”, el a remarca.
El a agrega cu huurdonan ta prefera di huur cas pa dia como airbnb entre otro, pasobra e ganashi ta mas grandi cu huur pa luna. E vacation rentals ta stroba no solamente e balor di compra di cas, sino tambe huurmento di cas.
“Ta importante pa a corto plaso regula e sector di vacation rentals pa asina domina y haci cu e crecemento di prijsnan di vivienda wordo para y vivienda por bira accesibel atrobe pa hende regular cu ta busca cas pa biba aden y no pa haci negoshi”, señor Hose Figaroa a duna di conoce.
