ORANJESTAD (AAN): Un di personanan encarga pa yuda duna e prome curso/workshop di monitor rif di coral organiza pa Fundacion Parke Nacional Aruba (FPNA) ta biologo marino y director di Dutch
Caribbean Nature Alliance (DCNA) Tadzio Bervoets.
Durante un conferencia di prensa Diaranzon mainta Bervoets a trece dilanti cu DCNA ta un organizacion cu ta provee sosten na e organizacionnan cu ta maneha e areanan proteha di e seis islanan di Reino Hulandes den Caribe.
“Den e caso aki e sosten ta den forma di workshops cu e enfoke riba monitor e rifnan di coral”.
E idea ta pa realmente entrena e staff di Parke Nacional y e boluntarionan den metodonan specifico di monitor rif.
Nos ta wak algo cos specifico manera e abundancia di pisca y cierto especie importante di pisca di rif y nan grandura, segun Bervoets.
El a sigui bisa cu banda di esaki ta controla cuanto coral tin den e seccion cu nan ta inspecciona.
Tambe e intencion ta pa wak si tin y ki tipo di enfermedad di coral tin y cuanto lobster y calco tin por ehempel den cierto area.
“E idea ta pa na final di e workshop aki di 4 dia, e participantenan bao di guia di FPNA haya e capacidad di regularmente bay inspecciona rifnan y midi con e salud di e rifnan ta”, segun Bervoets, kende a indica cu e metodo uza ta uno conoci mundialmente.
Durante e conferencia di prensa Roxanne-Liana Francisca di STINAPA Boneiro a splica cu el a bin yuda cu e protocolnan relaciona cu e monitoreo di e rifnan.
“Na Boneiro nos tin 11 sitio unda cu nos ta monitor e desaroyo y nos ta haci esaki cada 2 aña”.
E intencion di esaki ta pa ‘track’ con bo rif ta cambia, specialmente cu aworaki Aruba tin su propio Parke Marino.
Durante e inspeccion ta check con e cantidad di pisca ta cambia, ta check ki tipo di pisca tin den e area y kico ta pasa cu e coral, segun Francisca.
El a splica cu tambe ta wak e cantidad di lima cu tin, pasobra lima ta afecta e coral.
El a splica cu e intencion ta pa na final di e sistema di monitoreo, cada aña duna un update na tur esnan envolvi na Aruba pero tambe na instancianan internacional, kico a resultadonan tabata.
