Camara di Comercio y Industria Aruba (KvK) --- *Reforma fiscal mester bay man den man cu reduccion di gasto di Gobierno
ORANJESTAD (AAN): Un di e puntonan cu pa basta aña a keda pendiente ta e reforma fiscal. E punto aki ta figura tambe den e Landspakket Aruba. Gobierno a evalua 2 sistema di impuesto indirecto, esta BTW y ABB, pa por reemplasa BBO. Conforme e agenda di ehecucion di e Landspakket, Gobierno di Aruba mester a determina su escogencia entre e 2 alternativanan aki prome cu 15 di november 2021.
Camara di Comercio y Industria Aruba (KvK), hunto cu algun gremio comercial, a expresa na Minister di Finansas nan desapunto di no a wordo envolvi den e proceso di evaluacion y escogencia di e sistema di impuesto nobo. Alabes, a apela na e Minister pa mantene un sistema facil pa implementa tanto pa comercio en general como tambe pa Departamento di Impuesto (DIMP) y a urgi e Minister pa e diferente stakeholders por tin participacion si den e trayecto di preparacion pa implementacion di e sistema nobo y asina por aporta cu sugerencia y recomendacionnan practico.
Gobierno a anuncia diabierna ultimo di a scoge pa BTW, pues entrante 1 di januari 2023 lo elimina BBO y lo introduci BTW. Cierto producto y servicio, p.e. comestibel y bebida non-alcoholico lo cay bao e “laag tarief” y algun producto, manera medicina, lo wordo exclui di BTW (nul tarief). Pa demas producto y servicio lo aplica e “hoog tarief”. E bon di BTW ta cu esaki lo wordo cobra na frontera, pues di e forma aki tur persona lo contribui y e sistema aki no tin e parti acumulativo. No a anuncia oficialmente ainda cual lo ta e porcentahe cu lo aplica, pero tin entendi cu esaki por varia entre 12.5%-18%.
KvK kier bolbe enfatisa cu e meta di e diferente reformanan y restructuracion ta pa Aruba por yega na un posicion financiero stabiel y duradero. E proceso aki lo genera entrada pa e caha di Gobierno, pero a wordo condiciona na diferente puntonan, primordialmente reduccion di e gastonan di Gobierno, incluyendo e gastonan di salario. Pues, ta cardinal pa no crea e impresion eroneo cu en bista cu Gobierno lo haya mas entrada, lo tin espacio pa destina e placa pa aumenta su gastonan. Aun mas, mirando e hecho cu Hulanda a pone como un di e condicionnan pa Aruba por sigui ricibi sosten financiero, pa prolonga te proximo aviso e retencion di 12.6% di salario di empleadonan den sector (semi)publico.
Ta imperativo pa Aruba su economia por sigui recupera y cu sector comercial por bolbe para bon riba pia. KvK lo sigui monitorea e situacion di cerca y ta conta cu Gobierno su cooperacion pa duna participacion activo na KvK y e demas stakeholders den e procesonan cu ta relaciona na ehecucion di e puntonan den e Landspakket.
