*Alrededor di 40% no ta haci esaki
ORANJESTAD (AAN): Recientemente DIARIO a entrevista Sharine Croes- Dubero di Aruba Lening, tocante e seguro cu e studiantenan di Aruba ta bay tin ora cu nan bay studia na Hulanda.
Dubero a splica cu e studiantenan tin un Eigen Risico di 385 euro y un Eigen Bijdrage pa medicina di 250 euro.
“Bo no mester tin e placa na e momento cu bo ta bay haci uso di e aseguro, pasobra e ta wordo paga for di e placa di e lening”.
Nan ta haya nan placa y tin cu page for di esey, pues nos ta conseha e studiantenan pa pone e placa pa e seguro un banda ora cu nan haya nan asina yama ‘termijnbetaling’, segun Croes-Dubero.
El a sigui bisa cu ta stress riba e punto aki, pasobra un investigacion cu Aruba Huis a haci ta mustra riba e hecho cu 40% di e studiante di Aruba no ta pagando nan seguro.
Segun Croes-Dubero esaki ta algo hopi alarmante y e ta trece hopi problema.
“Nos tin casonan di studiante cu ta haya un accidente y ta haya un debe di 4 of 5 mil euro door cu nan no a paga nan seguro y awor papa cu mama tin cu saca nan cartera”, segun Croes-Dubero kende a indica cu un seguro semper ta hopi importante pa bo tin.
El a splica cu e seguro por ehempel ta paga pasashi pabo bay Aruba pa entiero, si a caso un famia cerca di bo fayece.
Tambe e seguro ta paga pa bo curpa yega Aruba si bo fayece na Hulanda.
Ora cu e muchanan yega Hulanda, e opvang ta bay sigui duna tur e consehonan necesario rond di e seguro y otro aspectonan importante.
