Cambionan di e Wetboek van Strafvordering nobo
ORANJESTAD (AAN): Dialuna mainta, durante un conferencia di prensa di Gobierno di Aruba, Minister di Husticia y Asuntonan Social sr. Rocco Tjon a elabora riba e cambionan, y kico esaki ta nifica pa loke ta e Wetboek van Strafvordering nobo.
Na prome luga e Wetboek van Strafvordering nobo ta bay percura pa mas derechonan pa victimanan. A base di e cambionan aki, e victimanan por tuma nota di e documentonan cu ta worde trata durante di un caso penal caminda antes esaki no tabata posibel, awo e victima tin inzage riba e ‘processtukken’, cual ta hopi importante. Banda di esaki, e victima ta bay tin un ‘spreekrecht’, pues e mes por vocifera durante di un caso kico e ta sinti y kico e ta pensa.
Pa loke ta e ‘schadevergoeding’, actualmente esaki ta limita na 50 mil Florin, y aworaki a base di e Wetboek van Strafvordering nobo no ta bay tin un limite mas. Esaki ta nifica cu e victima cu a worde perhudica door di lokual a sosode, tin derecho di ricibi e recompensa manera e victima ta haya husto, con tal cu esaki por worde proba. Pues cambionan hopi importante pa e victimanan.
Pa loke ta trata ambos e detenido y victimanan ta bay introduci ‘snelrecht zittingen’. A traves di e introduccion di e proceso di ‘snelrecht’, cual ta e palabracionnan cu a worde haci caba entre Ministerio Publico y Corte, un persona cu worde deteni por ehempel pa posesion di arma, bringa riba caya, menaza, destruccion etc. si ta trata di un caso “simpel”, e ‘voorlopig hechtenis’ ta bay worde aproba, pa motibo cu e ta un caso “simpel”. Pues, esaki por worde finalisa dentro di e terminonan ey, y e caso lo worde presenta mesora dilanti di un huez pa un decision por worde tuma.
Esaki ta beneficia ambos e victima y e detenido pasobra e caso ta worde ‘afgerond’ mas lihe. Tur e interogacion pa loke ta trata ‘voorlopig hechtenis’ mester worde graba awo, y esaki ta garantisa e integridad di cada investigacion.
Por ultimo, e instancianan encarga cu investigacionnan manera Ministerio Publico y Cuerpo Policial di Aruba ta bay haya hopi mas autoridad, pa nan por combati criminalidad na un manera mas eficiente y eficaz.
