Segun Minister Dangui Oduber --- ORANJESTAD (AAN): For di basta dia tin rijnan largo di auto relaciona cu testnan di Covid cu ta wordo realisa na e test center na Hospital.
Tin hopi reaccion di personanan cu tin cu bay test pero cu ora di sa cu nan tin cu para algun par di ora den rij, nan ta simpelmente ta dicidi di no bay test. Otronan si ta bay y keda warda te ora nan beurt yega.
Sinembargo, esaki ta un situacion hopi fastioso.
Relaciona cu esaki, a puntra den conferencia di gobierno y crisis team pakico no ta permiti laboratorionan local pa test hendenan local bao di AZV y pakico ta permiti solamente comercialmente.
Minister di Salud y Turismo, Dangui Oduber a laga sa cu e peticion aki a drenta cu laboratorionan tambe lo desea di haci test pa hendenan local. Pa algun tempo caba nan ta haci test pa turistanan na Aruba.
Awor e peticion a drenta un biaha mas y AZV a mantene su mes strictamente cu e ta cubri e testnan cu ta wordo na Laboratorio di Hospital pasobra e entrada ey ta wordo inverti bek den tur e problemanan cu tin na Hospital. Ta algo cu ta discutiendo cu AZV pa wak si ta bin cambio den e maneho cu nan a introduci, segun Oduber.
"Kiermen esaki ta un decision meramente di AZV for di e dia cu e crisis a cuminsa y nan a mantene nan mes den e decision aki. Pero nos ta evaluando e decision aki pa wak si nos ta trece cambio aden mirando e gran cantidad di casonan cu tin cu bo ta hacie un tiki mas accesibel pa tur hende si tin mas laboratorio cu ta ofrece PCR Test", e mandatario a indica.
Tin un posibilidad si, pero no a tuma un decision ainda, Minister Oduber a subraya.
