Yvonne Bermudes di CPHF:
*No expone e yiu na tanto calor y ruido!
ORANJESTAD (AAN) – Desde cu Centro pa Hoben y Famia a cuminza, diferente organizacion cu ta forma parti di dje manera Wit Gele Kruis, Fundacion Respeta Mi, Fundacion pa Nos Muchanan, Departamento di Asunto Social, y Tienda di Educacion, tur a forma parti di e Comision Vision Pedagogico, y nan tin como meta pa den temporada di carnaval, haci un campaña pa concientiza e mayornan y trece diferente tips pa esnan cu ta scoge pa nan yiu bay carnaval, pa nan tene cuenta cu ne durante e temporada aki. Asina Yvonne Bermudes a indica den entrevista cu DIARIO.
Bermudes a comenta cu e Comision ta consehando mayornan cu tin yiu menor di cinco aña no bay cu ne carnaval. Pero keto bay tin mayornan cu tin yiunan menor di cinco aña di edad cu ta bayendo carnaval cu nan, ta para rand di caminda y ta presencia e evento durante e dia.
Yvonne Bermudez a señala cu por mira den diferente programa di television mayornan cu mucha chikito disfraza y cu pechi bisti, ta wal carnaval, pero tambe tin hopi mucha cu no tin pechi bisti, cu tin earplugs na nan orea, cu no ta sinta den un sombra, y esaki tin e Comision di Centro pa Hoben y Famia preocupa.
Bermudez a subraya cu p’esey nan ta bay diferente medio di comunicacion pa comparti cu mayornan, haci nan conciente pa para keto y pensa riba e futuro di nan yiu, y por ta aworaki no ta conciente ki daño esaki ta haciendo pero riba termino largo tin su efecto riba e desaroyo di e muchanan vooral pa muchanan chikito bao di cinco aña, cu nan oido y nan cuero ta delicado. Ademas e muchanan aki tin necesidad di tin un rutina, trankilidad pa nan por sosega, den un ambiente safe y no den tanto desordo asina.
El a reitera su conseho pa mayornan cu si nan yiu ta bao di cinco aña lague na cas, preferiblemente pa mayor keda cu ne na cas, cu e ta sigur cu su yiu ta safe, pasobra e mes ta take care di dje. Si esaki no ta posible, y e mayor “per se” kier bay carnaval, tin diferente opcion actualmente; por tin familiarnan cu ta di confianza pero tambe diferente crèche aworaki cu ta atende cu cuido di mucha durante carnaval y na un prijs hopi economico, y cu por ta sigur cu e mucha ta mas safe cu si e ta den e paradanan.
