Riba Green Corridor, Avenida Nelson Oduber, y Watty Vos Boulevard
*Bo mag di bay na banda robez solamente ora di pasa un auto
* of ora bo yega rotonde pa bay sali bek na e salida banda robez
ORANJESTAD (AAN): Por corda cu riba Social Media, algun par di aña pasa, Cuerpo Policial di Aruba a haci un recordatorio chauffeurnan na Aruba riba e regla ora nan ta moviendo riba caminda di dobel-via.
Mirando cu e asunto aki ta cos di tur dia, awe DIARIO ta bolbe publica e articulo aki pues bo tin di corda cu bo mester keda core solamente na banda drechi.
Awendia, ora di combersa cu algun persona stranhero cu recien a bin biba na Aruba por constata cu nan ta di e pensamento cu core na man robez ta normal. Tin cu ta te hasta ta haci bofon y ta bisa cu esey ta algo cu ta conta na nan pais, pero cu na Aruba no.
Algo mas preocupante ta cu hopi di esnan cu ta core asina banda robez, te hasta kisas no tin ni rijbewijs. Kiermen, nan ta indocumenta na Aruba y nan a bin cumpra un auto aki na Aruba.
Wel wel, shon sabi, bo mag di bay na banda robez solamente ora di pasa un auto, of ora bo yega rotonde unda bo ta bay sali bek na e salida banda robez.
Aruba tin diferente sorto di caminda, y Polis ta kere cu semper ta bon pa refresca e ley y reglanan di trafico.
Un ehempel riba Green Corridor, Avenida Nelson Oduber, y Watty Vos Boulevard, abo como chauffeur tin di corda cu semper bo ta maneha bo auto na e parti drechi di caminda. Ta diferente chauffeur a yega di haya boet pa esaki ora nan a wordo gara ta core riba Sasakiweg (cu awor a bira Avenida Nelson Oduber).
Algun tips: Djis tene cuenta cu e consehonan aki suministra pa Cuerpo Policial di Aruba:
(*) Abo como manehador di auto por pasa un otro auto pero mester bay back na man drechi.
(*) NO por keda core na man robes riba e camindanan menciona.
(*) Den nos ley di trafico tampoco nos conoce “fast lane” ni tampoco “slow lane”.
Chauffeur riba e potret: E chauffeur riba e potret aki por haya un boet basta pica, si acaso Polis a gar’e. Pasobra el a djis core for di rotonde-pa-rotonde na banda robez, siendo cu e NO ta pasando ningun auto, y e rotonde mes ta basta leu ainda.
Polis ta convenci, cu un trafico sigur pa ami cu bo ta bal tur cos! Semper sigui nos regla y leynan di trafico!
