ORANJESTAD (AAN) – Parlamentario di fraccion di MEP, Setty Christiaans-Yarzagaray, a tuma nota di politiconan di oposicion,
cu a trece e celebracion di Dia di Betico na un otro tono, of color, bisando cu pakico Aruba ta celebra esaki si ya no tin su autonomia.
El a acentua cu autonomia no tin di haber cu e tema di natalicio di Betico, y e fecha a wordo celebra di acuerdo cu su logronan. “Pero si bo kier yega te eynan laga mi recorda y refresca memoria di esnan cu tabata tey na momento cu nos a perde un tiki di nos autonomia, pasobra segun lidernan di cierto partidonan politico, nan ta indica cu nos a perde autonomia na momento di Landspaket y COHO. No señores!”
Setty Yarzagaray a bisa y a trece dilanti cu CAft a wordo introduci na aña 2015, pues no na 2017-2021 ni 2022 na momento cu tin COHO y Landspaket. El a agrega cu si lesa e ley pakico CAft a bin, den e caso aki e Ley di Laft, por wak den su clausulanan cu e ta bisa cu e presupuesto di pais Aruba mester bay na e Colegio di CAft, prome cu e bin Staten. “Na aña 2015, y bisa mi ken tabata den gobierno na e momento ey. Si, e mesun lider di partidonan awe politico, cu ta papia di perde autonomia. Abo tambe tabata tey! Abo tambe tabata parti di e parti financiero y mal maneho, y cu bo no a trece informacion e tempo ey. Pues, no bay cambia mente di hende bisa cu nos a perde autonomia y awo nos ta celebra Dia di Betico”, Parlamentario Setty Christiaans- Yarzagaray a remarca.
“Nos a perde na 2015, na momento cu a introduci e ley di Laft, na momento cu a introduci un Caft na Aruba, na momento cu presupuesto, segun ley mester bin Staten pa aprobacion, cu a bay Raad van Advies pa conseho. Esey ta den ley prome, pero desde e tempo ey e tin cu bay CAft prome, ora nan duna nan huzga, despues e ta bin Parlamento. Eynan ta unda parti di Aruba su autonomia a wordo perdi. No na COHO, no na Landspaket”, e parlamentario a enfatiza.
