ORANJESTAD (AAN): Stichting Voor Verstandelijk Gehandicapten Aruba (SVGA) a forma un comision cu representantenan di casi tur departamento
pa informa comunidad di e enseñansa, guia y cuido cu SVGA ta brinda.
Un rueda di prensa tabata e prome actividad di 2024 pa pidi atencion pa nan aniversario. E comision aki lo zorg pa nan pagina di Facebook cu lo wordo yena cu informacion referente nan actividadnan y lo post vlog regularmente pa informa y educa e comunidad di Aruba di e meta/servicio di cada departamento di SVGA, asina Directora Els Van Homelen a indica.
Ademas SVGA lo tin un 'open dag' na september pa henter comunidad di Aruba pasa wak kico tur nan ta ofrece pa persona cu un discapacidad intelectual, fecha lo wordo anuncia despues.
Lo bin un caminata pa henter comunidad participa hunto cu SVGA y pa tin un actividad cu ta bon pa salud y tin integracion cu pueblo di Aruba. E fecha di e caminata tambe lo wordo anuncia despues.
Dia 6 di December 2024 lo tin un feria di wega pa e alumnonan, clientenan y habitantenan pa celebra e aniversario di 60 aña.
Lo tin un fiesta pa trahadonan na december pa gradici cada un pa nan contribucion tur dia pa haci un diferencia den e bida di e clientenan, alumnonan y habitantenan.
Hunto lo sigui traha pa personanan cu un discapacidad intelectual por desaroya nan mes pa bira mas independiente posibel segun nan capacidadnan.
SVGA ta gradici comunidad di Aruba di curason pa tur e apoyo durante e 60 aña di existencia di SVGA. Sin ayudo di comunidad no por a logra di ta unda nan ta awe.
