Reforma ta nifica deshaci di eror di ayera y crea futuro nobo --- *Mester defini politica enfrente bienestar di Pueblo sacrifica --- *Recuperacion no ta posibel sin cambio den mentalidad y accion
ORANJESTAD(AAN)—“Te awe Pueblo di Aruba no ta realisa kico a pasa cu su placa y kico tin su dilanti. Aruba a wordo ciega dor di politiconan, cu concientemente a crea e situacion.”
Esaki ta e opinion di expertonan cu ta lamenta e forma cu cortinanan di huma ta wordo lanta for di oposicion pa stroba Aruba mira y enfrenta e realidad financiero cu a wordo crea pa e pais, prome cu Covid-19 a basha economia abou na 2020.
Expertonan ta mustra cu Pueblo ta wordo stroba di acepta su responsabilidad democratico pa reforma despues cu e instrumento di democracia, cu ta politica, a wordo uza pa destrui e situacion financiero di Aruba.
“COHO ta resultado di mucho mas cu fayo politico. Den caso di Aruba, e desastre politico a wordo crea concientemente manera tur documento ta demostra,” expertonan ta mustra.
COHO ta un sistema di reforma pa e pais bandona e problemanan serio cu e ta aden pa por yega na un futuro den cual e pais por uza su entradanan na forma total pa sigui construi e base nacional.
Expertonan ta indica cu na e momento aki, placa cu Aruba mester tin pa inverti de necesidad cu e situacion mundial serio ta exigi, no ta presente.
E culpabelnan di loke ta pasa actualmente na Aruba ta e politiconan cu den Gobierno y como mayoria den Parlamento entre 2009 y 2014, a condena Aruba na kiebra di autonomia financiero di Aruba, loke ta nifica cu e pais no por para riba su propio pianan.
Di e forma aki nan a invalida e proceso democratico, cu ta nifica cu maneho di Gobierno mester ta na interes di Pueblo.
Concientemente Gobierno Mike Eman a crea debe como parti di su maneho cu mester wordo paga.
Hulanda a actua na 2014, pero Citgo a wordo uza pa ciega Aruba cu a baila te na 2017 ora e pais a keda sin bista riba futuro, manera tur rapport ta trece dilanti.
“Goberna ta nifica mira kico ta crea pa futuro,” informantenan ta indica. Loke a crea entre 2009 pa 2017 pa Aruba tabata debe y mas debe.
E sistema democratico di Aruba a wordo uza entre 2009 pa 2017 pa politiconan por a haya popularidad mientras futuro di Aruba tabata basha abou.
E prueba mas palpabel ta e hecho cu na fin di 2017 ningun instancia, ni sikiera Banco Central mes, por a bisa kico futuro lo a trece pasobra Aruba tabata depende di Citgo di Nicolas Maduro.
Na 2018 Reino a exigi cambio, cu ta reforma cu mas enfasis na momento cu Gobierno Wever-Croes a hereda Aruba sin e fantasia di crecemento economico di Citgo pero si cu un debe, cu mester a paga.
Si Aruba no a cuminsa reforma, e lo mester a acepta estado di bancarota, cu Aruba tabata aden.
Pa reforma por tuma lugar mester di supervision pa garantisa cu e accionnan necesario ta wordo tuma cu un cambio di e mentalidad cu a deshaci di bienestar di Aruba.
“Ta un mentalidad a wordo aplica entre 2009 pa 2017. E mentalidad di iresponsabilidad cu gasta placa cu no tin y crea debe pa futuro sin medio pa paga e debenan aki,” informantenan ta mustra.
Informantenan ta indica na DIARIO cu COHO a wordo introduci na 2020. Hulanda a actua na 2014 a base di Statuut despues cu for di 2009 un maneho cu a destrui Aruba financieramente a wordo aplica.
Mester defini politica atrobe enfrente Pueblo, cu ta motibo di e sistema politico cu ta wordo uza pa e pais tin un gobernacion.
Prueba cu DIARIO ta acumula ta mustra cu si Hulanda mester dicidi pa supervisa e periodo durante cual Aruba mester paga debe, e mester practica supervision durante por lo menos 20 aña, cu ta e periodo durante cual Aruba mester paga debe pa proyectonan cu a wordo prepara contra ley cu ta exigi pa proyectonan no ta contene riesgo pa Pueblo na ningun forma.
Hulanda y Aruba mester yega na acuerdonan cu no por mishi cu dignidad di e Pueblo di Aruba pero si mester sirbi e interes di e Arubiano, cu tin e responsabilidad directo pa Aruba segun e sistema democratico.
