NEW YORK: Jamaiquinonan cu ta bibando na Merca, a haya nan ta baha man drasticamente cu nan plato faborito di Oxtail, despues cu prijs di esakinan a bira hopi caro mes.
Hecho ta cu Jamaiquinonan gusta come Oxtail, sea cu nan ta biba riba nan isla of den exterior. Y e hecho cu e delicatessen aki ta consisti principalmente di weso y vet, nunca a stroba nan cu ta adora e cuminda delicioso aki pa come riba Diadomingo, sirbi cu aroz y bonchi.
Pero e debocion cu Jamaiquinonan den exterior tin pa Oxtail, a stop abruptamente aña pasa ora cu na algun parti di Merca, e prijs a bula dramaticamente for di $8.99 pa lbs., te na $18.99.
Tin varios motibo pakico e prijs a subi, di cual uno ta e rebendedornan ta codicia y a presumi cu Jamaiquinonan lo paga cualkier prijs sin keha. Pero tambe tin asunto cu e criaderonan Canades di baca, for di unda mayoria di e rabonan aki ta bin, y tambe cu China ta cumprando casi tur producto di carni baca di Merca y Canada na prijsnan premium, pues casi no tin di esaki pa wordo bendi na mercado domestico, y esaki ta hisa prijs. Restaurantnan a haya nan obliga na hisa prijs tambe. Un cuminda di Oxtail cu tipicamente ta costa como $24, awor ta te banda di $50 pa uno. Y ora bo come esaki na New York City, bo tin di agrega 20% pa tip, y 8.25% pa tax.
