Director Erwin Lopez ta satisfecho
ORANJESTAD (AAN): Tanto e Director como tambe docentenan ta hopi contento cu e resultado final di e aña escolar di 2021-2022, cu a logra un porcentahe di 87% di e graduadonan.
Director Erwin Lopez ta agradecido na e empuhe di e docentenan, y tambe e esfuerzo di e alumnonan pa a logra e nivel halto di graduacion e aña aki.
En general, e Director ta sinti cu awor e nivel di comportacion, di cumplimento cu regla, y hopi mas a conoce un cambio drastico na EPB Oranjestad na Hato.
Lopez ta esun cu a impulsa y introduci reglanan nobo pa asina trata di mantene decencia y respet riba tereno di scol, unda e enfoque principal e ora ta keda riba educacion.
Asina el a introduci un regla cu ningun hende no mag di subi tereno di scol bisti cu loke ta wordo yama na ingles como ‘Saggy Pants’. Esey ta carson cu ta keda colga hopi abao, y bo ta mira e paña interior di e individuo.
Lopez a introduci e regla, y a hasta pone un borchi di advertencia na entrada, cu esnan cu wordo haya ta cana asina riba tereno di scol, lo wordo manda cas pa cambia nan carson, y lo ricibi straf pa traha tambe.
E regla a logra? Na opinion di Lopez, esey ta corecto! Pues el a fungi como un extra tipo di educacion pa mustra nan riba nan deber y tambe con ta respeta decencia. Pero awor bo ta mira cu e alumnonan a bira mas conciente di e problema di carson aki. E meta no tabata pa kita alumno of straf nan, pero ta mescos cu un mayor unda bo ta keda educa e alumno.
Resultado ta cu e alumnonan a stop di bay scol cu e tipo di carson aki, y docentenan tambe tabata contento cu e regla aki.
Epoca di Digital a yega: Pa e siguiente aña escolar di 2022-2023, tanto EPB Oranjestad y EPB San Nicolas ta drentando e epoca digital. Nan ta trahando duro riba esey, y tin hopi stipulacion cu mester ta poni den nan lugar pa asina na Augustus e wordo lanza.
Lopez a describi esaki como un reto grandi, no djis pa e alumnonan, pero pa e docentenan tambe. Pasobra digitalizacion nifica cu e docentenan tambe tin di bay scol bek, tambe tin di siña di nobo, pa e epoca moderno aki.
Corda cu pa hopi alumno, ya ta hopi ‘normal’ pa traha digital, nan a lanta cune cu nan telefon y tablet, pero e docentenan adulto lo por haye tiki dificil, y tin di bay siña hopi aspecto nobo.
EPB Oranjestad ta preparando pa start cu 4 opleiding nobo tambe awor na 2022-2023. Y otro aña lo tin 10 opleiding mas cu ta bay habri ainda.
Infrastructura ta wordo drecha: Director Lopez a bisa cu EPB Oranjestad ta bayendo poco-poco dilanti. Nan ta drechando e infrastructura bek, ta ricibiendo machine nobo, tambe equiponan nobo, y e ta un procedimento largo como cu e ta exigi hopi placa pa por drecha e lugar den un tempo rapido. Pero cu tempo y pasenshi lo bay yega eynan.
EPB Oranjestad ultimo temponan a keda casi mes grandi pa cu capacidad di alumno. E promedio di alumnonan cada aña ta como 1.000 studiante. Diahuebs 14 di Juli tabata e deadline pa inscribi alumnonan nobo. Si bo no a logra esey p abo yiu, ya bo sa caba cu bo ta hopi laat, y no ta duna ningun excepcion.
