ORANJESTAD (AAN): Departamento di Enseñansa Aruba (DEA), seccion Studiefaciliteiten,
ta recorda studiantenan cu preparacion pa esnan cu lo sigui studia ta inclui varios rekisito importante cu tin cu worde regla mas pronto cu ta posibel.
Cuenta di banco local: Un di e rekisitonan ta habri un cuenta di studiante na un di nos banconan local (si e studiante no tin esaki ainda).
Ta asina cu na momento cu e studiante ta bay haya su Arubalening, esaki ta worde pasa riba un cuenta di banco local na nomber di e studiante. E cuenta por ta hunto cu un mayor pero e mester ta primeramente na nomber di e studiante.
Den caso cu ta bay studia den exterior, mester pidi banco pa haci esaki un “Non Resident Student Account”. Lo por haci esaki mesora ya ta evita di tin cu bolbe pa haci cambio.
Upload den Arubalening Portal: Manera cu e cuenta di banco ta cla, e studiante tin cu upload un prueba di e cuenta aki den su Arubalening Portal. Riba e prueba nos mester por wak e nomber di banco, nomber di e studiante y tambe e number di cuenta.
Tin banco ta pidi un carta di prueba (verklaring) cu e studiante lo bay haya Arubalening pa asina nan por habri e cuenta di banco pa e studiante. E studiante por pidi e verklaring aki via e number di WhatsApp di Arubalening 594-4140 (solamente pa WhatsApp). Ora di manda mensahe pidiendo e carta (verklaring) pa banco, no lubida di pone bo datonan personal (nomber completo y fecha di nacemento) pa asina DEA por traha e verklaring.
E preparacionnan cu tin cu haci prome cu sali pa exterior como studiante ta hopi, pero si cuminsa cu nan trempan por keda cla cu tur cos na tempo
Pa cualkier pregunta relaciona cu Arubalening por manda un email na عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته. of un whatsapp na 594-4140.
