Minister di Husticia Arthur Dowers:
- Lo duna oportunidad pa crea mas ingreso pa Gobierno
- Stimula un miho comportacion di automobilistanan
ORANJESTAD (AAN): Den un entrevista recien cu DIARIO, Minister di Husticia Arthur Dowers a duna detaye tocante e plannan cu Gobierno di Aruba tin pa un maneho riba controlnan mas efectivo y eficiente di Aruparking haciendo uzo di tecnologia moderno. Segun Minister Dowers, esaki ta duna oportunidad pa crea ingreso pa Gobierno na un manera mas structura y transparente.
E Minister a señala cu durante e ultimonan añanan, no tabatin un maneho consistente di e consecuencianan segun ley pa esnan cu no ta cumpli cu e regla di parkeo. Den e sistema anterior na comienso di operacionnan di Aruparking, klemmento di auto a ser rechasa di inmediato. Sancionnan tabata severo y no tabata semper husto.
Minister Dowers a indica cu bou di e sistema nobo, lo bin un structura progresivo riba control y tambe di sancionnan cu lo por ta basa riba e cantidad di violacion cu un automobilista comete. Esaki por inclui tambe cu eventualmente Aruparking por retira e auto den caso di ripiticion di infraccionnan.
Segun e ley actual, Aruparking por klem autonan cu ta staciona contra regla di parkeo. Despues di dos ora cu e auto ta geklem, e auto por wordo getakkel, y e multa total por yega te 400 florin. Sinembargo, Minister Dowers a indica cu e sistema aki no lo sigui na mesun manera, y lo wordo reemplasa pa un procedimento nobo cu ta stimula un miho comportacion di nos automobilistanan.
Tocante e maneho di parkeo den otro zona, particularmente den e zona hotelero di Palm Beach, Minister Dowers a bisa cu mester haci un analisis profundo pa por desaroya un plan di maneho cu ta facilita parkeo den e area turistico, cu na e momento aki ta hopi caotico.
