Directora Anne Witsenburg a revela: - *Ta inverti un average di mey miyon florin den mantencion so cada aña
ORANJESTAD (AAN): Directora di Stichting Monumentenfonds Aruba, Anne Witsenburg, despues di a reunion cu formador a duna di conoce cu nan a enfoca riba e ultimo 12 aña. Nan a celebra 25 aña di existencia e aña aki, pero den e ultimo 12 añanan nan a sobrebibi y a traha sin subsidio.
Locual nan a bisa Formador ta cu nan no ta pidi placa, pero nan ta purba di coopera mas tanto cu tur instancia envolvi. Esunnan di gobierno pero tambe esunnan priva.
El a sigui bisa cu nan a enfoca riba e impacto social-economico di restauracion y mantencion di e monumentonan, den e sentido cu nan tambe ta contribui na economia di Aruba. Por ehempel, a indica, ta inverti un average di mey miyon florin den mantencion so cada aña.
Tambe el a menciona e impacto riba turismo. Tin hopi mas turista, bishitantenan di Aruba cu ta buscando algo autentico, unico y e 'cultural heritage' ta ofrece esey, Witsenburg a remarca.
Stichting Monumentenfonds a presenta na Formador un lista di deseonan y nan a ripara cu Formador y su team tabata hopi interesa y nan ta aprecia esaki hopi.
E prome punto tabata cu nan kier pa mas monumento wordo proteha, principalmente esnan cu tin doñonan priva. E di dos punto ta enfoca riba e discusionnan cu Hulanda tocante Landspakket y COHO pa pone mas enfasis riba cultura como algo cu ta conecta y cu ta positivo den e sentido cu tin un historia comparti den Reino Hulandes.
E di tres punto ta cu nan a laga sa cu nan ta dispuesto pa tuma over algun di e edificionan monumental di Land Aruba. Sea pa tuma over of pa cumpra y asina re-uza nan, restaura nan y preserva nan pa futuro, Anne Witsenburg a declara.
Tabata presente tambe Sr. Croes, Sr. Profeet y Sra. Maduro di e fundacion.
