Generacion di tur partido politico di Aruba mester reconoce historia
*Betico Croes a negocia reparticion di bienes y base di bienestar
*SVb Aruba ta e sosten sagrado hasta pa entiero digno di Arubiano
ORANJESTAD(AAN)—Pa historia di Aruba, sirbi directamente e interes di e Arubiano hancra den e lucha di Status Aparte cu Betico Croes cu entrega di su propio bienestar a logra, mester tene semper na berdad, pa e pais no wordo perhudica pa por sirbi cayman sabi na boca di rio!
Falta di vision y un maneho descabeya cu awe ta zink Aruba den debe, ta resultado di e maneho desastroso di Mike Eman, cu nunca a entrega na Aruba un plan, cu a conoce logro.
Mike Eman a drenta historia como e Prome Ministro cu mester a admiti na Pueblo di Aruba na 2010, cu e no por cumpli cu su promesa di campaña pa deshaci di BBO, pasobra esaki lo destrui bienestar di Aruba.
Gobierno di Mike Eman no solamente a mantene BBO te awe, pero Gobierno di Mike Eman a subi BBO!
E mayoria di Parlamento di AVP, a trapa riba principio democratico pa complace Mike Eman den uzo liber di 1,6 Biyon Florin di Aruba sin control di Parlamento ni Reino, y a tene e abuso di 1.6 Biyon, pafor di e Derecho di Budget di Parlamento, cu ta e herment di representacion di Pueblo pa asegura cu Gobierno ta hiba un bon gobernacion.
Ora Mike Eman a reduci entrada di Aruba cu mitar di e suma di BBO cu el a kita pero no a reemplasa como entrada di Aruba, el a mata e stabilidad financiero di Aruba.
Tristo den henter e asunto aki ta, cu Mike Eman cu for di dia cu el a nace a percura pa un dia e bira Principe Heredero di Aruba, a presenta su mes hunto cu su grupito, como e intelectualnan universitario, cu lo a entrega Aruba dicha y prosperidad.
Cu sunchi cu abrazo Mike a percura pa e ta na cuna na nacemento di tur ciudadano di Aruba pero tambe na tur entiero y asina a haci su mes popular te na e momento cu Hulanda a habri wowo di Aruba, cu Mike Eman a hinca den estado di bancarota.
Mientras henter mundo a lanta contra Nicolas Maduro, Mike Eman a bay busca Nicolas Maduro pa entrega futuro den man di Nicolas Maduro.
Cielo a spaar Aruba, cu a manda Mike Eman cas despues cu Mike Eman a laga Aruba den estado di bancarota pa Gobierno Evelyn Wever-Croes soluciona.
Awe Mike kier uza pensioen di Behez di ancianonan pa e por sigui goza di un entrada cubri cu placa di Pueblo di Aruba, manera el a haci practicamente for di 2009 ora el a gana eleccion.
Awe Mike Eman kier uza e pensioen di behez di e Arubiano, pa e por sigui disfruta riba olanan di bida di Aruba.
Mike ta hunga cu e e fondo di Pensioen di Behez di Aruba, cu a wordo negocia dor di Betico Croes, cu a bira e politico cu a duna prueba cu e ta cumpli cu loke e priminti y no a traiciona e causa di Aruba.
Status Aparte, logro di Betico Croes, a haci cu mester a yega na un separacion di bienes entre Aruba y Antia Hulandes na 1986.
Betico Croes y su team cu a prepara Aruba debidamente pa Status Aparte, a percura pa Aruba tin su propio Banco Social di Aseguro, SVB, cu ta maneha e bienestar di e Arubiano na e momentonan mas dificil cu ta den maleza y na bienes.
Betico Croes, hunto cu su team di cual hasta na Mesa Redonda AVP no kier a forma parti, a percura pa Aruba tin su SVB, dirigi pa experto Edwin Jacobs, cu hasta na momento di pandemia a percura pa segura e bienestar di e Arubiano.
Awe sin mas, pa e por gana eleccion, Mike Eman ta bolbe cu continuacion di su cadena di promesanan cu nunca el a cumpli den politica.
Aruba no por permiti sin mas, cu e persona cu a haci cu awe e Arubiano mester paga un belasting sumamente halto como pago di e debe nacional cu Mike a crea hunto cu entre otro e abuso di 1.6 Biyon pa Bo Aruba, ta bin cumpra curazon di Aruba cu un aumento di pensioen di behez di 50 porciento, despues cu na tur momento cu esaki tabata posibel, durante ultimo añanan, Gobierno Wever-Croes a paga aumento di pensioen di behez.
Awe cu Aruba, victima di fantasia di Mike Eman cu hasta a ofrece Nicolas Maduro asistencia pa goberna Venezuela loke hasta Nicolas Maduro a nenga, ta riba bon caminda, Mike a bolbe.
E grupo di hobennan cu ta depende di futuro di nan pais, tin e deber di percura pa Mike Eman no bolbe destrui Aruba, cu ya ta paga sumanan enorme na belasting como pago di su proyectonan di fantasia y su abuso di placa di Pueblo di Aruba!
