ORANJESTAD (AAN) – Diego de Cuba, Presidente di Sindicato STA, a señala den un entrevista cu Gerencia di NV Elmar
ta carece di duna e informacionnan necesario tocante e negociacionnan cu ta bay tuma lugar.
El a menciona cu un di e puntonan importante cu ta bay tin durante e negociacion aki ta na unda cu STA a bin compronde cu tin un compania di Consultancy yama Berenschot Groep BV, cu ta bezig cu un reorganizacion, yudando NV Elmar cu esaki.
E ta trahando riba un structura salarial completamente nobo, pa e trahadornan. Esaki si Gerencia a bisa STA. “Pero kico ta pasa? Conociendo e hendenan di Berenschot cu ta wordo contrata pa haci e trabaonan aki, nos ta bisa cu e ta hole stinki. Di con nos ta bisa cu ta hole stinki? Pasobra Gerencia a trece dilanti pa nos, cu locual Berenschot a bin cune, 70% di e empleadonan trahando na NV Elmar, ya ta den nan maximo caba. Kico esey ta encera? Esey ta encera cu practicamente, bo a muri! Di con? Por ehemplo bo tin 45 aña, anto e structura salarial di Berenschot ta bisa cu e salario cu bo tin, ta den su maximo of a pase caba, aunke nan no por baha bo salario”, De Cuba a señala.
El a splica cu un trahador cu a yega 45 aña tin cu keda struggle 20 aña te dia e yega su edad di pension cu e mesun salario ey. Esaki ta algo frustrante, e trahador no ta bay sinti ningun estimulo; e ta bin trabao pa bin y esaki ta algo cu bao ningun circunstancia Sindicato STA lo bay acepte, y esey e sindicato a splica Gerencia di NV Elmar.
