ORANJESTAD (AAN): Soroptimist International Club Aruba, den colaboracion cu Restore a Sense of I Can (RSC),
ta invita hobennan di 12 aña pariba pa participa den e Virtual Summer Camp 2026, un programa online diseña pa stimula creatividad y desaroyo personal durante e vakantie grandi.
E campamento virtual lo tuma luga durante juli y augustus 2026 y lo consisti di 10 sesion interactivo di un ora cada un. Participantenan lo por amplia nan conocemento den diferente area moderno, manera Inteligencia Artificial (AI), programacion, cybersecurity, desaroyo di web y app, media digital, edicion di audio y video, y simulacionnan cientifico.
E di dos orientacion oficial lo tuma luga diadomingo awo 12 di juli pa 5:00 p.m. , mientras cu e sessionnan virtual lo cuminsa dialuna 13 di juli. Participantenan por scoge entre dos grupo, depende di e dianan cu ta mas conviniente pa nan.
Cu e iniciativa aki, Soroptimist International Club Aruba ta sigui inverti den e desaroyo di hobenan, dunanan oportunidad pa adkiri habilidadnan relevante pa futuro, haci conexion cu otro hobennan y pasa un vakantie educativo, inspirador y productivo, sin importa unda nan ta.
Interesadonan por registra uzando e QR code of e link cu por ser haya riba pagina di Facebook di Soroptimist Internacional Club Aruba.
