CEO di ATA, Ronella Croes: - ORANJESTAD (AAN): E excepcion di PCR test aworaki ta solamente pa e residentenan di Merca cu a vacuna completamente.
Ta monitoreado e situacion local na Aruba pa loke ta e maneho di e virus, pero tambe e maneho di e virus den diferente pais.
Esey ta un di e criterianan cu ta wordo uza internamente door di expertonan pa asina indica si e pais respectivamente den ki nivel di risico e ta cay, asina CEO di Oficina di Turismo, Ronella Croes a indica dialuna den conferencia di prensa di Crisis Team y Gobierno.
El a agrega cu e nivel di risico di Merca ta abao y pesey por introduci e flexibilisacion aki.
Pa loke ta trata Latinoamerica al a bisa cu hopi di e paisnan ta riba un nivel di risico mas halto ainda y como tal ta keda monitorea na ki momento por introduci flexibilisacion y esaki mester carga e valides y e plataformanan cu por conta riba dje, a remarca.
Segun Croes, Merca ya caba tin e plataformanan di e 'Smart Health Card' y asina tambe tin algun otro manera 'CommonPass' y otronan cu ta trahando cu nan y papiando cu nan caba pa asina sigui expande esaki na Merca.
El a sigui bisa cu Union Europeo a uni forsa, cu excepcion di Inglatera, y nan tambe tin e 'Digital Covid Certificate'. Ta den dialogo cu nan tambe pa habri y uza e plataforma aki.
Pa Latinoamerica esaki ta mas leu ainda di yega e punto eynan. Ta paisnan cu tin mas risico, pero banda di esaki mester por conta cu un plataforma cu lo por yuda den comproba e prueba di vacunacion ta valido, Croes a enfatisa.
