Parlamentario drs. Shailiny Tromp-Lee:
ORANJESTAD (AAN): Na 2018 mi a cuminsa haci un desk research pa loke ta trata e tematica di salario minimo. Despues cu mi a repasa y analisa Landsverordening Minimumlonen, Codigo Civil di Aruba, consehonan di SER al respecto, mi a cuminsa cu e parti di comparacion cu e otro paisnan den Reino pa loke ta trata salario minimo.
Unabes mi tabatin esaki cla, mi a cuminsa cu mi ronda di consulta na 2019 pa trata e iniciativa di ley cu mi kier a presenta pa loke ta trata cambio di ley di salario minimo pa logra cu esaki ta bira uno husto, cu ta introduci un salario minimo pa hobennan entre 16-17 aña, cu ta ancra un metodo di calculacion fiho pa stipula e porcentahe di inflacion. Alabes mi a usa e ronda aki pa inventarisa deseo pa cambio cu diferente stakeholders mes ta presenta. Asina por haci un solo trabou.
Manera 2019 a habri mi a cuminsa reuni cu diferente stakeholder entre otro Minister di Labor, Departmamento di Labor, SER, FTA y Hefe di Seccion di Investigacion di DAO. Despues di e ronda aki mi a cuminsa traha riba e iniciativa di ley pero a yega na e punto cu falta data pa mi por calcula e impacto di e cambionan proponi y na mi opinion mester haci e cambionan na un manera responsabel. Asina mi a cuminsa e proceso tambe pa wak con ta bay yega na e cifranan necesario. Pa mi mala suerte pandemia a bati na nos porta y tur cos a para.
Mi por bisa si cu asina nos a cuminsa recupera y cosnan a cuminsa stabilisa Minister Glenbert Croes a start e proceso di investigacion pa por yega na e data necesario pa porfin nos por realisa un sistema di salario husto pa nos hendenan. Esaki a culmina den un concepto di cambio ley al repecto cu ya caba a keda aproba pa Conseho di Minister y tin cu cana su caminda via Raad van Advies rumbo Parlamento. Relaciona cu esaki recientemente Minister Glenbert Croes a haci un presentacion al respecto na Comision Fiho di Labor di Parlamento y a anuncia y presenta esaki na publico tambe.
Mi ta sostene e cambionan cu a keda presenta mirando cu desde 2019 mi ta planteando e proposicion pa bin cu un salario minimo pa ora (minimum uurloon) pa haci e salario minimo uno mas husto. Ta bon pa pueblo realisa cu actualmente na Aruba ta existi un salario minimo di Awg. 1986.20 pa luna y Awg. 463.25 pa siman, no obstante e cantidad di ora cu bo ta traha, si ta salario minimo bo ta gana, ta e suma di Awg. 1986.20 bo ta gana. Mas cu claro esaki ta trece un situacion inhusto cu ne. Esnan cu ta traha mas ora pa siman ta gana menos pa ora. Aki bou mi ta ilustra e situacion actual. (Wak Grafico 1)
Si e concepto di cambio di ley keda aproba pa Parlamento, e deseo di Gobierno lo ta pa entrante 1 di januari 2025 nos lo tin un salario minimo pa ora. Esaki sigur lo tin su impacto pa e clase trahador y aki bou mi ta ilustra kico e salario minimo lo bira pa luna segun e cantidad di ora cu bo ta traha. (Wak Grafico 2).
Mi ta convenci cu e cambio aki ta na su lugar y si no tabata pa pandemia e lo tabata un realidad caba. Palabranan di danki sigur mi kier manda na Departamento di Labor cu a realisa e investigacion necesario y na Minister Glenbert Croes cu a pone como un prioridad.
{gallery}Sistema nobo di salario minimo lo ta uno husto, special pa esnan cu ta traha mas cu 40 ora{/gallery}
