Reaccion di Sindicato di trahadornan di Setar
ORANJESTAD (AAN): E ultimo dianan aki pueblo por a tuma nota cu tin vandalismo tumando lugar riba e netwerk di Setar. Ningun hende ainda no sa kico ta intencion di e persona(nan) aki pero un cos nos ta sigur e daño cu el a haci na comercio y pais Aruba ta enorme.
Sindicato di e Trahadornan den Telecomunicacion ta lamenta e tipo di actonan aki y ta spera cu pronto e malhechor(nan) aki cay den man di husticia. Alavez STT ta pidi pueblo pa ta extra alerta den e dianan aki.
Di otro banda STT ta sumamente orguyoso di e trahadornan di Setar NV cu a actua rapidamente, cu a tuma e pasonan necesario y traha te laat den oranan di marduga pa reestablece e servicionan back.
No ta facil ora cu bo ta worde sorprendi pa un acto di vandalismo asina pero Aruba semper por conta riba empleadonan di Setar NV cu ta contribui grandemente na e operacion y existencia di e compania pa asina por aporta substancialemnte na caha di gobierno por medio di dividendo, impuestonan, licencia y mas.
Loke pa STT ta increibel y inaceptabel pa kere ta cu ora un acto di vandalismo asina tuma lugar, cu por hasta categorise como un ‘sabotahe’, bo ta haya un persona cu por kere cu por saca ventaha di e situacion y purba di hunga populismo.
Den e caso aki, Sindicato STT ta referi na Lincoln Gomez cu ta representante di Digicel.
Di con tempo cu pueblo tabata sufri di e pandemia caminda cu mas di 34 mil conciudadano a perde trabao, e ora Gomez no a papia na nomber di Digicel pa asina yuda esnan cu a perde trabao. Pero awor cu un vandalismo a tuma lugar ta purba di pone e compania nacional den un spot light negativo? Sindicato STT ta categorisa esaki como oportunista.
Empleadonan di Setar NV tabata solidario cu pueblo caminda nan a contribui cu mas cu 5 miyon na e fondo di fase.
Setar NV ta emplea directo mas di 400 empleado y contratista, pues por bisa cu miles di hende ta biba directo y indirecto di e compania nacional. Banda di emplea mas di 400 empleado Setar NV a contribui grandemente na e caha di pais Aruba: 180 miyon na dividendo, 85 miyon na winstbelasting, 130 miyon na licencia, y ta yuda grandemente na diferente instancia cultural, enseñansa y deporte por medio di sponsor.
Setar NV ta patrimonio di pueblo caminda e placa ta worde inverti back den e pueblo y no ta bay pa accionistanan pafor di Aruba. Setar NV semper tey pa yuda den tempo bon y tempo malo paso Setar NV ta di pueblo, den un solo palabra Setar ta di bo tambe.
