Awe un aña escolar sumamente exigente ta haya su inicio
*Preparacion di e mucha pa un mundo adapta na crisis mundial
*E peligro di polio y situacion social despues di era di abundancia
ORANJESTAD(AAN) — Awe un aña escolar nobo ta haya su inicio. Lo no ta un aña escolar manera hasta den tempo di pandemia nos a conoce, pero un temporada mundial nobo, cu ta afecta tur mucha como participante di desaroyo mundial.
Nos ta sigui cu atencion loke mundo di enseñansa ta trece dilanti despues di un vacacion cu a mira e cara di mundo cambia.
Na momento cu muchanan subi tereno di schoolnan awe, un parti importante di nan dia lo keda den man di educadornan, profesionalnan cu tareanan cu ta inclui conocemento di materia den buki pero tambe profesionalnan cu hunto cu mayornan lo dicidi riba e forma di pensa di e mucha y e contenido cu mucha lo duna na cada balor den comunidad.
Un tempo di abundancia a termina pa mundo, cu ta drenta un futuro den cual hende mester ahusta su mes y pone balornan di acuerdo cu e cultura y moral di e pueblo caminda nan a nace dilanti.
E obligacion di tur sector den un comunidad actualmente ta, pa den un mundo di cambio moral enorme, percura pa e mucha realisa kico ta e herencia cultural y moral cu el a ricibi.
Awe trankilidad mundial a spart for di otro na momento cu e forma di poder financiero centralisa den un man yen di hende cu ta yama nan mes lider den e sistema comunista, ta destrui un pais yama Ukraine y ta mata pa horta propiedad di un Pueblo.
Esaki ta e mensahe cu e mucha ta ricibi den noticia mundial, caminda comunismo ta propaganda uzo di poder pa trapa riba hende cu ta wordo ciega, den e persecucion di mas placa y mas poder di e lidernan comunista.
Balor di hende, moral di Pueblo a bira suela pa e concepto comunismo cu ta ciega hobennan tur parti di mundo y cu ta crea trampa pa hende cu ta kere cu nan ta lucha pa idealnan halto mientras nan ta lucha solamente pa placa y mas placa pa nan saco.
Con maestronan den e situacion mundial actual, ta splica muchanan cu placa no tin mas balor cu hende y cu bienestar di un pais pa asina duna nan e formacion basico cu ta crea e ciudadano ehemplar cu no ta mantene su bista fiha riba placa y mas placa?
E Pandemia Covid-19 a enfrenta e muchanan cu e realidad di fragilidad di bida humano pero tambe di poder di placa.
E muchanan a mira con den un rato, un simpel virus a destrui e realidad mundial di e momento y a exigi hende demostra cu e ta parti di un mundo, den cual solidarismo ta demostra di ta e herencia moral y cultural mas grandi di Aruba.
E muchanan a mira morto nan dilanti y awe mester enfrenta tambe Polio, cu ta plama rond mundo y pa cual nos ta pidi Dios cuida Aruba atrobe.
Maestronan a prepara un plan pa actua for di awor y defende bida di muchanan cu tin mayor cu no kier pa nan vacuna?
Simar a reuni cu su miembronan pa asina instrui nan riba e peliger nobo, cu por afecta su miembronan tambe ya cu schoolnan ta wordo considera uno di e centronan mas facil pa Polio plama?
Con SIMAR a atende cu su miembronan riba e necesidad pa splica muchanan cu mester pensa mas leu cu kico ta na moda y kico ta estilo y cuanto placa nan mester exigi di nan mayornan den tempo dificil?
E formadornan di Aruba den pasado a prepara Arubianonan pa e temponan mas dificil cu Aruba a conoce cu tabata e tempo cu por ehempel durante un Augustus, cu a bira historico, Aruba a lanta para pa lucha pa su Status Aparte.
E mucha di awe ta prepara pa lanta para pa su pais y no keda dilanti spil di egoismo?
Un era di abundancia a termina pa mundo y tambe pa Aruba cu a mira (manera Hulanda mes ta trece dilanti den su rapportnan) con gobernantenan den pasado a haya man liber pa destrui Aruba y a base di e pensamento materialista, a logra pa e promesa di “mitar BBO”, hinca hasta maestronan di school den situacion financiero dificil.
Awe un aña di formacion di mucha na school, ta cuminsa cu exigencianan pisa pa e educadornan cu tin e futuro di e mucha y di e pais den man.
