CARACAS: Un total di siete aerolinea di pasahero y cargo na Venezuela, a expresa nan intencion di bula pa Curaçao, awor cu autoridadnan di Caracas y Hulanda,
y e isla mes a anuncia cu dia 3 di April 2023 lo tin e reapertura total di frontera cu tabata cera desde Februari 2019.
Tabata dia 31 di Januari, cu representanenan di Venezuela, Den Haag, y Caribe Hulandes a reuni na Caracas pa defini e aspectonan tecnico cu e meta di habri bek frontera. Prome cu esey, lidernan di gremio comercial di Venezuela cu Curaçao y Aruba a topa dia 13 di Januari na Oranjestad pa impulsa e intercambio comercial entre e paisnan.
E aerolineanan a bisa cu na principio, por ta cu tur di nan ta interesa pa e ruta aki di Curaçao, pasobra mayoria di nan aworaki ta bulando solamente pa Republica Dominicana y e otro ruta cu nan tin habri ta Panama.
Un experto a bisa cu tur e aerolineanan venezolano tin capacidad di bula pa Curaçao sin problema.
E fuente a bisa cu e ta un vuelo cortico, unda bo ta bay y bin bek cu mesun jetfuel abordo, y bo por bula cu cualkier avion.
Contrario na Curaçao, e isla di Aruba a propone pa habri solamente frontera maritimo pa intercambio di producto, specialmente cuminda y material di construccion entrante 1 di Mei. Pero ya caba e aerolinea estatal Conviasa a laga sa dia 22 di Januari, cu nan ta spera di inclui den nan oferta un viahe entre Las Piedras (Punto Fijo) pa Aruba.
