SAN FRANCISCO: Pa algun tempo caba, hopi hende ta download y instala Aplicacionnan alternativo pa complementa e funcionnan di e messenger di WhatsApp,
ora bo ta sinti cu e no ta haciendo suficiente pa bo. Nan ta parce di ta cuestionnan hopi punctual, pero e ta bay segun e logica di pensamento: Si e compania no ta duna e servicio, y otro si ta haci esey... pakico no purbe toch?
E problema ta cu e otro Apps aki cu bo ta download y instala, y cu ta bin di tercer instancia, ta un peligro: Ni maske con inocente su funcion ta, door di instala nan bo ta duna nan acceso sin restriccion na e contenido di WhatsApp y tur bo chats, y esaki ta representa un problema di seguridad pa abo mes, y eventualmente pa e compania. Ademas, no ta trata aki di Apps cu ta permiti agrega sticker pa messenger. Ta referi aki na Apps cu ta reemplaza WhatsApp directamente y ta cuminza asumi otro funcion, manera dunabo preview di contenido, manda mensahenan broadcast na gran cantidad, sconde chats, pa bo tin 2 account di WhatsApp riba mesun telefon, chats cu bubbles, contestanan automatico, y mas.
Nan por ta mustra atractivo, pero nan ta implementacion di desaroyadornan desconoci na kende bo ta duna acceso na tur combersacion. Esey ta e motibo pakico WhatsApp ta limita activamente di comparti informacion na unda e otro Apps ta trata di mete nan mes, mientras cu despues poco-poco nan mes ta bin cu e funcionnan aki, pero den forma oficial.
AVISO DI WHATSAPP:
Awor e compania di WhatsApp a dicidi na bin dilanti cu un advertencia serio, y ta apunta dede riba dos Apps cu kizas bo tin instala den bo smartphone. Ta trata di ‘WhatsApp Plus’ y tambe ‘GB WhatsApp’.
WhatsApp ta adverti cu bo account por wordo suspendi temporalmente, si detecta cu bo tin e Apps aki instala riba bo smartphone.
“E aplicacionnan no permiti, manera WhatsApp Plus y GB WhatsApp, of esnan cu ta insisti cu nan ta capaz di move tur chat di WhatsApp di un smartphone pa otro, ta versionnan altera di WhatsApp. E aplicacionnan no-oficial a wordo desaroya pa tercer persona y ta violando nos condicion di servicio,” e compania a skirbi.
WhatsApp no ta permiti e uso di e aplicacionnan ey di tercer instancia, debi cu no ta posible pa confirma nan practica di seguridad, segun e compania a bisa.
